ठाणे : नवे ठाणे अशी ओळख असलेल्या घोडबंदर भागात मोठमोठी गृहसंकुले उभी राहत असल्याने येथील लोकसंख्येत दिवसेंदिवस वाढ होत आहे. परंतु येथील पाणी टंचाईच्या समस्येवर ठाणे महापालिकेला अद्याप ठोस उपाय मिळालेला नसल्याचे स्पष्ट झाले असून यंदाही या भागात जानेवारी ते मे महिन्यात निर्माण होणाऱ्या पाणी टंचाईच्या काळात टँकरद्वारे पाणी पुरवठा करण्याचे नियोजन पालिकेने आखले आहे. या कामासाठी २४ लाख रुपयांच्या कामाची निविदा पालिकेने काढली आहे.
ठाणे शहरात सद्यस्थितीत चार स्त्रोतांमार्फत दररोज ५८५ दशलक्ष लीटर इतका पाणी पुरवठा करण्यात येतो. त्यामध्ये महापालिकेच्या स्वत:च्या पाणीपुरवठा योजनेतून २५० दशलक्ष लीटर, महाराष्ट्र औद्योगिक विकास महामंडळाकडून १३५ दशलक्ष लीटर, स्टेम कंपनीकडून ११५ दशलक्ष लीटर आणि बृहन्मुंबई महापालिकेकडून ८५ दशलक्ष लीटर इतका पाणी पुरवठा करण्यात येतो. शहराची लोकसंख्या २८ लाखांच्या घरात गेली आहे. वाढत्या लोकवस्तीमुळे शहरात पाणी टंचाईची समस्या निर्माण होत आहे. त्यातच पाणी पुरवठा योजनेतील जलवाहिन्यांच्या देखभाल आणि दुरुस्ती कामासाठी पाणी पुरवठा बंद ठेवला जात असल्याने ठाणेकरांना पाणी संकटाचा सामना करावा लागतो. धरणातील पाणी नियोजनासाठी जानेवारी महिन्यापासूनच पाणी कपात लागू केली जाते. जून महिन्यापर्यंत या पाणी कपातीत वाढ होत जाते. यामुळे जानेवारी ते मे महिन्यात शहरात सर्वत्र पाणी टंचाईची समस्या निर्माण होते. नवे ठाणे अशी ओळख असलेल्या घोडबंदर भागात गेल्या काही वर्षांपासून पाणी टंचाईची समस्या जाणवत असून उन्हाळ्यात ही समस्या अधिक तीव्र होताच या भागात टँकरची मागणी वाढते. परंतु पालिकेकडे दोनच टँकर उपलब्ध असल्यामुळे प्रशासनाला नागरिकांच्या मागणीनुसार टँकरद्वारे पाणी पुरवठा करणे शक्य होत नाही. यामुळेच पालिकेकडून दरवर्षी खासगी टँकर भाड्याने घेण्यात येतात. यंदाही पालिकेने भाड्याने टँकर घेण्याचे नियोजन आखले आहे. या कामासाठी २४ लाख रुपयांच्या कामाची निविदा पालिकेने काढली आहे. यानुसार पालिका खासगी टँकर भाड्याने घेऊन त्याद्वारे नागरिकांना विनामुल्य पाणी पुरवठा करणार आहे, अशी माहिती सुत्रांनी दिली.
हेही वाचा…घरगुती खानावळ, पोळी भाजी केंद्र दुहेरी आर्थिक कोंडीत, भाज्यांचे वाढत्या दरामुळे खर्चात वाढ
उन्हाळ्यामध्ये शहरात पाणी टंचाईची समस्या निर्माण झाल्यास तेथील नागरिकांना टँकरद्वारे पाणी पुरवठा करता यावा, यासाठी दरवर्षी असे नियोजन करण्यात येते. दरवर्षीप्रमाणे यंदाही अशाचप्रकारचे नियोजन करण्यात आले आहे. अतुल कुलकर्णी कार्यकारी अभियंता, ठाणे महापालिका
