Natasha Awhad: “भाजपाला ही निवडणूक जिंकायचीच होती, कारण…”, जितेंद्र आव्हाड यांच्या मुलीचा खळबळजनक दावा

मविआला ५० च्या खाली का ठेवले?

नताशा आव्हाड यांनी आपल्या अधिकृत एक्स हँडलवर निकालावर भाष्य करणारी सविस्तर पोस्ट टाकली आहे. या पोस्टमध्ये त्यांनी म्हटले, “निवडणूक निकालात फेरफार करून भाजपा पक्ष स्वतःला १०० जागा घेऊन शांत बसला असता. पण त्यांनी इतक्या जास्ती जागाच (१३२) लक्ष्य का ठेवले? त्याचप्रमाणे सहकारी पक्ष शिवसेना (शिंदे) आणि राष्ट्रवादीच्या (अजित पवार) इतक्या जास्त जागा का वाढवून दिल्या? महाविकास आघाडीला ५० जागांच्या खाली का ठेवले गेले?

“कारण भाजपसाठी ही एक अतिमहत्त्वाची निवडणूक होती आणि काहीही झाले तरी भाजपाला सत्तेत यायचे होते. शिवाय, महायुतीमधील दोन्ही पक्षांपैकी कोणत्याही पक्षाला त्यांच्याशी किंवा महाविकास आघाडीशी सौदा करण्याची संधीच द्यायची नव्हती. यासाठी निकाल इतका हुशारीने तयार करण्यात आला की त्यात भाजपा शिवाय सरकारच स्थापन करता येणार नाही. याची काळजी घेतली गेली”, असे नताशा आव्हाड यांनी म्हटले.

भाजपला जिंकणे इतके महत्त्वाचे का होते?

भाजपाला विजय मिळवणे आवश्यक होते. याचीही तीन कारणे नताशा आव्हाड यांनी सांगितली आहेत. ही कारणे खालीलप्रमाणे..

१. अदाणींनी धारावी प्रकल्प गमावला असता.

२. केंद्रातील त्यांचे सरकार धोक्यात आले असते.

३. भाजपा पक्ष महाराष्ट्राच्या राजकारणातून बेदखल झाला असता.

“यामुळे महाराष्ट्राचा निकाल निवडणुकीपूर्वीच दिल्लीत ठरवला गेला. राज्यात झालेल्या निवडणुका हा फक्त दिखावा होता”, अशी टीका नताशा आव्हाड यांनी सोशल मीडिया पोस्टद्वारे केली आहे.