लोकसत्ता खास प्रतिनिधी
ठाणे: येथील नौपाडा, कोपरी, गांधीनगर, हाजुरी आणि लुईसवाडी भागात गढुळ पाण्याचा पुरवठा होत असून या पाण्याला दुर्गंधी येत असल्याने येथील नागरिकांच्या आरोग्याचा प्रश्न ऐरणीवर आला आहे. धरण क्षेत्रात झालेल्या अतिवृष्टीमुळे गढुळ पाण्याचा पुरवठा होत असल्याचा दावा करत पालिका प्रशासनाने पाणी उकळून आणि गाळून पिण्याचे आवाहन नागरिकांना केले आहे.
ठाणे महापालिका क्षेत्रात चार स्त्रोतांमार्फत दररोज ५८५ दशलक्षलीटर इतका पाणी पुरवठा करण्यात येतो. त्यात महापालिकेच्या स्वत:च्या योजनेतून २५० दशलक्षलीटर, स्टेम प्राधिकरणाकडून ११५ दशलक्षलीटर, महाराष्ट्र औद्योगिक विकास महामंडळाकडून १३५ दशलक्षलीटर आणि मुंबई महापालिकेकडून ८५ दशलक्षलीटर इतका पाणी पुरवठा करण्यात येतो. त्यामुळे हे सर्वच स्त्रोत शहरातील पाणी पुरवठ्याच्या दृष्टीकोनातून महत्वाचे मानले जातात.
हेही वाचा… बनावट वाहन क्रमांक वापरुन फिरणाऱ्या वसईतील चालकाला कल्याणमध्ये अटक
मुंबई महापालिकेकडून होणारा पाणी पुरवठ्याचे वितरण नौपाडा, कोपरी, गांधीनगर, हाजुरी आणि लुईसवाडी भागात करण्यात येते. या भागात गेल्या काही दिवसांपासून गढुळ पाण्याचा पुरवठा होत आहे. या पाण्याला दुर्गंधी येत आहे. या दुषित पाण्यामुळे नागरिकांचे आरोग्य धोक्यात आले आहे. दुषित पाण्याच्या पुरवठ्यामुळे नागरिक हैराण झाले असून याच मुद्द्यावरून पालिकेच्या कारभारवर नागरिकांकडून टिका होत आहे.
हेही वाचा… डोंबिवलीतील गोग्रासवाडी मधील संथगती काँक्रीट रस्त्याने नागरिक हैराण
दरम्यान, मुंबई महापालिकेच्या जल विभागाने दिलेल्या सूचनेनुसार, शहराला पाणीपुरवठा करणाऱ्या धरण क्षेत्रात अतिवृष्टी झाल्यामुळे धरणातून जलवाहिनीत गढूळ पाणी येत आहे. तसेच, पाण्याला वासही येतो आहे. हे पाणी पिसे-पांजरापोळ जलशुद्धीकरण केंद्रातून शुद्ध करण्यात येते. तरीही नागरिकांनी पाणी गाळून आणि उकळून प्यावे, असे आवाहन ठाणे महापालिकेने केले आहे.
