उल्हासनगरमध्ये भटक्या कुत्र्याचा २० जणांना चावा

सर्व जखमींवर उल्हासनगरच्या शासकीय रुग्णालयांमध्ये उपचार सुरू आहेत. कॅम्प क्र. ३ मधील सी ब्लॉक रस्त्यावर मंगळवारी दुपारी तीन ते पाच वयोगटांतील १५ ते १६ मुले रस्त्यावर गटागटाने खेळत होती. अचानक या भागात एक पिसाळलेला भटका कुत्रा आला. त्याने खेळत असलेल्या मुलांना चावे घेण्यास सुरुवात केली. त्यामुळे बेसावध असलेली मुले सैरावैरा पळू लागली. तरी या मुलांचा पाठलाग करून कुत्रा त्यांना चावू लागला. १६ मुलांच्या हात, पायांना या कुत्र्याने चावे घेतले. मुलांचा वाचविण्यासाठी परिसरातील चार स्त्रिया पुढे आल्या. त्यांनाही कुत्र्याने लक्ष्य केले. अठरा जणांवर उपचार करून घरी सोडण्यात आले आहे. एक मूल व स्त्रीला गंभीर दुखापत झाल्याने त्यांच्यावर उपचार सुरू आहेत, असे रुग्णालयातील सूत्राने सांगितले.