अंबरनाथ शहरात लवकरच ऑलिम्पिक दर्जाच्या तरण तलावाची उभारणी केली जाणार आहे. अंबरनाथ नगरपालिकेने यासाठी नुकतीच ११ कोटी रुपयांच्या कामाची निविदा जाहीर केली आहे. यात आंतरराष्ट्रीय जलतरण महासंघाच्या नियमाप्रमाणे तरण तलाव बांधण्याचे काम केले जाणार आहे. या तरण तलावामुळे अंबरनाथ शहरात आंतरराष्ट्रीय स्पर्धांमध्ये सहभागी होण्यासाठी आवश्यक सरावाची संधी उपलब्ध होणार आहे. तसेच मुंबई आणि नवी मुंबई नंतर अंबरनाथ शहरात राष्ट्रीय आणि आंतरराष्ट्रीय जलतरण स्पर्धा भरवणे शक्य होणार आहे.
अंबरनाथ शहराला क्रीडा नगरी म्हणून नावलौकिक मिळवून देण्यासाठी स्थानिक लोकप्रतिनिधींच्या मदतीने अंबरनाथ नगरपालिकेने तयारी सुरू केली आहे. काही वर्षांपूर्वी स्थानिक खासदार डॉ. श्रीकांत शिंदे यांच्या माध्यमातून अंबरनाथ शहरात आंतरराष्ट्रीय दर्जाचे शूटिंग रेंज सुरू करण्यात आले होते. या शूटिंग रेंजमुळे मुंबई, पुण्यानंतर थेट अंबरनाथमध्ये आंतरराष्ट्रीय दर्जाच्या स्पर्धांची तयारी करणे सोपे झाले होते. आज येथे प्रशिक्षण घेणारे अनेक विद्यार्थी राष्ट्रीय पातळीवर अनेक स्पर्धा जिंकत आहेत. याच धर्तीवर अंबरनाथ शहरात भव्य असे क्रीडा संकुल उभारले जाते आहे. त्यात आंतरराष्ट्रीय दर्जाचे निकष पाळत खेळांची मैदानी तयार केली जात आहे. अंबरनाथ शहराला क्रीडा नगरी म्हणून नावलौकिक मिळवून देण्यासाठी महत्त्वाच्या क्रीडा सुविधा उपलब्ध केल्या जाणार आहेत. त्यासाठी स्वंतत्र सल्लागार नेमण्यात येणार आहे. यात आता ऑलिम्पिक दर्जाचे तरुण तलावाचा समावेश झाला आहे. सुमारे २० कोटी रुपये खर्च करून अंबरनाथ शहरातील पूर्व भागात सर्वेक्षण क्रमांक १४९ या ठिकाणी हा तरण तलाव उभारला जाणार आहे. यात स्थापत्य बांधकाम, तलाव बांधकाम आणि तलावातील जलशुद्धीकरण प्रकल्प अशा तीन टप्प्यांचा समावेश आहे. यातील तरण तलावाच्या कामाला लवकरच सुरुवात होणार आहे. अंबरनाथ नगरपालिकेने ११ कोटी रुपयांची तलाव बांधण्याची निविदा नुकतीच जाहीर केली. त्यामुळे लवकरच तरण तलावाच्या उभारणीला सुरुवात होणार असल्याची माहिती अंबरनाथ नगरपालिकेचे मुख्याधिकारी डॉ. प्रशांत रसाळ यांनी दिली आहे.
