लोकसत्ता प्रतिनिधी
ठाणे : ३१ डिसेंबरच्या मध्यरात्री रस्त्या लगत उभी असलेली बसगाडीच मद्यपीने चोरी केली. परंतु या बसगाडीचा अपघात झाल्याने चोरट्याला अटक करणे पोलिसांना शक्य झाले. परिसरात फेरफटका मारण्यासाठी त्याने ही बसगाडी चोरी केल्याची कबूली दिली. याप्रकरणी त्याच्याविरोधात वर्तकनगर पोलीस ठाण्यात गुन्हा दाखल करण्यात आला आहे. या मद्यपी चालकामुळे एखाद्या गंभीर अपघाताची घटना घडली असती अशी चर्चा आता सुरू झाली आहे.
तक्रारदार हे वाहतुकदार असून त्यांची एक बसगाडी आहे. ३० डिसेंबरला त्यांनी बसगाडी वर्तकनगर येथील कोरस भागातील रस्त्याकडेला उभी केली होती. ३१ डिसेंबरच्या मध्यरात्री एका २१ वर्षीय व्यक्तीने त्यांची बसगाडी चोरी केली. ती बसगाडी त्याने घोडबंदर येथील चितळसर ते मानपाडा या रस्त्यावर आणली असता, ती एका दुभाजकला धडकली.
आणखी वाचा-जुनी डोंबिवलीतील ग्रामस्थांचा शास्त्रोक्त कचरा विल्हेवाट प्रकल्पाला विरोध
घटनेची माहिती पोलिसांना मिळाल्यानंतर त्यांनी त्याची चौकशी केली असता, त्याने ही बसगाडी चोरी केल्याची कबूली दिली. तसेच त्याने मद्य प्यायल्याचेही आढळून आले. त्यानंतर पोलिसांनी वाहतुकदाराला संपर्क साधून या बाबत माहिती दिली. याप्रकरणी वाहतुकदाराच्या तक्रारीनंतर गुन्हा दाखल झाला आहे. मद्यपीने फेरफटका मारण्यासाठी बसगाडी चोरी केल्याची कबूली दिली. याप्रकरणात त्याला अटक केली आहे.
