डोंबिवलीत कोपरमध्ये गांजाच्या साठ्यासह एक जण अटकेत; सत्यवान चौकातील जुगार अड्डा बंद

लीलाधर सुरेश ठकार (रा. सिध्दार्थनगर झोपडपट्टी, कोपर क्राॅस रोड, हनुमान मंदिर शेजारी, कोपर, डोंबिवली) असे अटक करण्यात आलेल्या इसमाचे नाव आहे. डोंबिवली पश्चिमेत कोपर हद्दीतील सिध्दार्थनगर भागात एक इसम अंमली पदार्थ विकण्यास बसला आहे, अशी माहिती पोलीस उपायुक्त अतुल झेंडे यांच्या नियंत्रणाखालील विशेष अंमली पदार्थ विरोधी पथकाला मिळाली.

या पथकाने सिध्दार्थनगर भागात हनुमान मंदिर शेजारी सापळा लावून लीलाधर ठकार यांना अटक केली. त्यांच्यावर अंमली पदार्थ प्रतिबंध कायद्याने गुन्हा दाखल करण्यात आला. जुनी डोंबिवली, कोपर, कुंभारखाणपाडा, देवीचापाडा भागात काही इसम अनेक वर्षापासून किरकोळ पध्दतीने एम. डी. पावडर, गांजाची तस्करी करत असल्याची स्थानिकांमध्ये चर्चा आहे. ही तस्करी ठाणे ते कर्जत पट्ट्यात अधिक प्रमाणात चालते अशी चर्चा आहे.

डोंबिवली जुगार अड्डा बंद

डोंबिवली पश्चिमेत देवीचापाडा येथे सत्यवान चौकात गुन्हेगार पार्श्वभूमीचे काही भाई जुगार अड्डा चालवित होते. या भाईंची स्थानिक भागात दहशत असल्याने कोणीही स्थानिक नागरिक याविषयी तक्रार किंवा उघडपणे बोलत नव्हते. या जुगार अड्ड्यांच्या ठिकाणी जुगार खेळणारे इसम त्यांची वाहने रस्त्यावर उभी करत होते. त्यामुळे वाहतुकीला अडथळा येत होता. यामधील काही इसम हे तडीपार होऊन आलेले होते. त्यामुळे आपण कोणाला घाबरत नाही, असा या भाईंचा तोरा होता. सत्यवान चौकातील जुगार अड्डा,देवीचापाडा जेट्टी येथील गांजा अड्डा याविषयीच्या तक्रारींच्या अनुषंगाने लोकसत्ताने वृत्त प्रसिध्द केले. पोलीस उपायुक्त अतुल झेंडे यांनी त्याची गंभीर दखल घेतली. स्थानिक विष्णुनगर पोलीस, विशेष अंमली पदार्थ विरोधी पथकाची कारवाई होण्यापूर्वी जुगार अड्ड्यावरून भाई गायब झाले. डोंबिवलीत विष्णुनगर पोलीस ठाणे हद्दीतील देवीचापाडा जेट्टी, कलावती आई मंदिर परिसर, गोपीनाथ चौक, कुंभारखाणपाडा, गणेशनगर गणेशघाट, नवापाडा, रेल्वे मैदान भागात गस्त भागात विशेष पोलिसांची गस्त वाढल्याने अंमली पदार्थ सेवन करणाऱ्यांची कोंडी झाली आहे. महाराष्ट्रनगरमध्ये गोपीनाथ चौकाजवळील धवनी इमारतीच्या समोरील भागात एक कचरा टाकण्याची जागा आहे. या भागातील एका पडिक इमारतीच्या जागेत रात्रीच्या वेळेत काही गांजा तस्कर पडदे लावून बसत असल्याच्या नागरिकांच्या तक्रारी आहेत. रात्रभर ते या भागात धिंगाणा घालतात, असे रहिवासी सांगतात.