ठाण्याच्या गोखले रस्त्यावरील झाडाच्या फांद्यांसह पालापाचोळा उचलला ; लोकसत्ताच्या बातमीनंतर प्रशासनाला आली जाग

पावसाळ्याच्या कालावधीत साथीचे आजार उद्भवून नागरिकांचे आरोग्य धोक्यात येऊ नये यासाठी ठाणे महापालिका आयुक्त डाॅ. विपीन शर्मा हे शहर स्वच्छ ठेवण्याचे आदेश सातत्याने देत आहेत. असे असले तरी वृक्ष प्राधिकरण विभागाकडून मात्र त्यांच्या आदेशाकडे कानाडोळा केला जात असल्याची बाब समोर आली होती. ठाणे शहराच्या मध्यवर्ती भागातील गोखले मार्गावर काही दिवसांपुर्वी वृक्ष छाटणीची कामे करण्यात आली होती. या कामानंतर झाडाच्या तोडलेल्या फांद्या आणि पालापाचोळा मात्र रस्त्याकडेला जमा करून ठेवला. हा कचरा उचलण्यात आलेला नव्हता. यामुळे रस्त्याकडेला जागोजागी हे ढिग दिसून येत होते. पावसामुळे पालापाचोळा सडून मच्छर होऊन साथीचे आजार पसरण्याची भिती व्यक्त होत होती. तरीही वृक्ष प्राधिकरण विभागासह पालिका प्रशासनाकडून त्याकडे दुर्लक्ष होताना दिसत होते. शहरातील विविध भागात अशीच परिस्थिती असल्याचे दिसून येते. यामुळे वृक्ष प्राधिकरण विभागाच्या कार्यपद्धतीवरच प्रश्नचिन्ह उभे राहिले होते. या संदर्भात लोकसत्ता मध्ये वृत्त प्रसारित झाल्यानंतर पालिका प्रशासन खडबडून जागे झाले आणि त्यांनी तेथील कचरा उचलण्याचे काम केले. गुरुवारी सायंकाळी हे काम पूर्ण झाले.