पदभार स्विकारताच परिवहन मंत्री प्रताप सरनाईक एक्शन मोडवर, खोपट आगारातील असुविधेबाबत अधिकाऱ्यांना धारेवर धरले

खोपट एसटी आगारात फेब्रुवारी महिन्यात एका कार्यक्रमाचे आयोजन करण्यात आले होते. त्यावेळी तत्त्कालीन मुख्यमंत्री आणि सध्याचे उपमुख्यमंत्री एकनाथ शिंदे यांनी आगाराची पाहाणी केली होती. त्यावेळी आगारात मोठ्याप्रमाणात असुविधा आढळून आल्या होत्या. शिंदे यांनी अधिकाऱ्यांना खडसावत येथील असुविधांची दुरुस्ती करण्याचे आदेश दिले होते. प्रताप सरनाईक यांनी परिवहन मंत्री पदाचा पदभार स्विकारला आहे. आगारात सुविधा उपलब्ध झाल्या की नाही याची पाहणी करण्यासाठी सरनाईक अचानक एसटी आगारात शिरले. त्यांनी पाहाणी केली असता, असुविधा कायम असल्याचे दिसून आले. स्वच्छतागृह, स्नानगृहांची अवस्था अत्यंत वाईट आहे. प्रवाशांनाही वेळेत बसगाड्या उपलब्ध होत नाही.

हेही वाचा…शहापूर हादरले! सराफाच्या दुकानातील कर्मचाऱ्याचा गोळीबारात मृत्यू

पहिला दिवस असल्याने कारवाईचा हेतू नाही. पण शिस्त असावी. ठाणे आमचे घर आहे. त्यामुळे घरापासून सुरूवात करावी यासाठी या आगाराची पाहाणी केली. भविष्यात राज्यातील इतर आगारांचीही पाहणी करणार आहे असे सरनाईक म्हणाले. या समस्यांचे निराकारण होऊ शकते. भविष्यात चुकीला क्षमा नाही. एका महिन्यात रिझल्ट दाखवा अशा सूचना सरनाईक यांनी अधिकाऱ्यांना दिल्या.