ठाणे जिल्हा परिषदेच्या ५२ शिक्षकांना पदोन्नती

ठाणे जिल्हा परिषदेच्या १ ली ते आठवी पर्यंतच्या एकूण १ हजार ३७९ शाळा आहेत. या शाळांमध्ये ७० हजारहून अधिक विद्यार्थी शिक्षण घेत आहेत. या शाळांमधील शिक्षकांची अनेक पदे रिक्त असल्याची बाब मध्यंतरी ठाणे जिल्हा नियोजन समितीच्या बैठकीत समोर आली होती. असे असले तरी अनेक शिक्षक हे पदोन्नतीच्या प्रतिक्षेत होते. जिल्हा परिषद शिक्षण विभागातील ५२ शिक्षक पदोन्नतीसाठी पात्र ठरले होते. मात्र, गेल्या काही महिन्यांपासून त्यांना पदोन्नती देण्यात आली नव्हती. या शिक्षकांना जिल्हा परिषदेचे मुख्य कार्यकारी अधिकारी रोहन घुगे यांच्या विशेष मार्गदर्शनाखाली शिक्षण विभागाने नुकतीच पदोन्नती दिली आहे. यामुळे पदोन्नती झालेल्या शिक्षकांमध्ये आनंदाचे वातावरण आहे.

ठाणे जिल्हा परिषद शिक्षण विभागातील विस्तार अधिकारी (शिक्षण) वर्ग ३ श्रेणी ३ या पदासाठी केंद्रप्रमुख आणि मुख्याध्यापक असलेल्या ११ शिक्षकांना पदोन्नती देण्यात आली. तर, मुख्याध्यापक पदावर ४१ शिक्षकांना पदोन्नती देण्यात आली. यासाठी शिक्षणाधिकारी बाळासाहेब राक्षे, अधीक्षक बी. ए. गोमासे, विस्तार अधिकारी (शिक्षण) आशिष झुंजारराव तसेच शिक्षण विभागातील सहाय्यक प्रशासन अधिकारी, कनिष्ठ प्रशासन अधिकाऱ्यांनी प्रयत्न केले. या पदोन्नती कार्यक्रमावेळी शिक्षक आणि शिक्षण विभागातील अधिकारी-कर्मचारी मोठ्या संख्येने उपस्थित होते. शिक्षकांना दिल्या जाणाऱ्या विविध लाभाबाबत विशेष पाठपुरावा वेळोवेळी मुख्य कार्यकारी अधिकारी घेत असल्याने शिक्षण विभागातील ५२ शिक्षकांना पदोन्नतीचा लाभ देण्यात आला आहे. याबाबत संबंधित शिक्षक आणि शिक्षक संघटना यांनी समाधान व्यक्त केले.