पोलीस भरतीमध्ये यंत्राचा वापर करुन काॅपीचा प्रयत्न; पाच उमेदवारांसह सातजण अटकेत

अर्जुन सुंदर्डे (२२, जालना), आनंदसिंह दुलत ( जालना), युवराज रजपुत (२२, संभाजीनगर), सुवर्णा पिंगारी (२५, संभाजीनगर), संदीप दुधे (३१, संभाजीनगर) अशी उमेदवारांची नावे आहेत. तर, छकुली साळवी (२०, अहमदनगर) आणि जीवन मानसिंग (२५, संभाजीनगर) अशी इतर दोघांची नावे आहेत. या सर्वांना पोलिसांनी अटक केली आहे. तर याप्रकरणातील इतर आरोपींचा पोलीस शोध घेत आहेत. ठाणे शहर पोलीस आयुक्तालयात २०२२-२३ या वर्षासाठी भरती प्रक्रिया सुरू आहे. रविवारी ठाणे पोलीस आयुक्तालयाच्या हद्दीमध्ये नौपाडा, ठाणेनगर, वर्तकनगर आणि वागळे इस्टेट येथील चार केंद्रावर लेखी परिक्षा सुरू होती. काॅपीचे प्रकार टाळण्यासाठी परिक्षा केंद्राच्या आवारात मोठा पोलीस बंदोबस्त तैनात करण्यात आला होता.

हेही वाचा >>>वडिलांच्या मित्राकडून अल्पवयीन तरुणीवर बलात्कार, ७५ वर्षीय आरोपी अटकेत, अंबरनाथमध्ये संताप

असे असतानाही अर्जुन, आनंदसिंह, युवराज, सुवर्णा आणि संदीप यांनी परिक्षेमध्ये काॅपी करण्यासाठी स्पाय इअरपिस नावाचे ब्यूटूथ यंत्र लपवून परिक्षा केंद्रात प्रवेश करण्याचा प्रयत्न केला. बंदोबस्तावरील पोलिसांनी त्यांची तपासणी केली असता, त्यांच्याकडे लपविलेले यंत्र आढळून आले. उमेदवारांचे नातेवाईक परिक्षा केंद्राबाहेर थांबून प्रश्नांची उत्तरे या यंत्राद्वारे देणार होते. या पाचही जणांना पोलिसांनी ताब्यात घेतले. तर परिक्षा केंद्राबाहेरुन छकुली आणि जीवन या दोघांना पोलिसांनी ताब्यात घेतले. याप्रकरणांमध्ये ठाणेनगर पोलीस ठाण्यात दोघांविरोधात, नौपाडा येथे तिघांविरोधात, वर्तकनगर येथे दोघांविरोधात आणि वागळे इस्टेट येथे एकाविरोधात गुन्हा दाखल करण्यात आला आहे. पोलिसांनी सात जणांना अटक केली आहे. तर उर्वरित आरोपींचा पोलीस शोध घेत आहेत.