ठाणे : ठाणे शहर विधानसभा मतदार संघातुन विजयी झालेले भाजपचे उमेदवार संजय केळकर यांना राबोडी परिसर वगळता नौपाड्यापासून ते घोडबंदरपर्यंतच्या ९ पैकी ८ प्रभागात मताधिक्य मिळाले तर, मुस्लीम बहुल मतदार असलेल्या राबोडी प्रभागात ठाकरे गटाचे उमेदवार राजन विचारे यांना मताधिक्य मिळाल्याचे समोर आले आहे. मनसेचे उमेदवार अविनाश जाधव यांना एकाही प्रभागात मतांची आघाडी मिळालेली नाही. यानिमित्ताने राजन विचारेंची राबोडीत तर, संजय केळकरांची संपुर्ण ठाण्यात गाडी सुसाट गेल्याचे स्पष्ट होत आहे.
ठाणे शहर विधानसभा मतदार संघातून भाजपचे उमेदवार संजय केळकर, ठाकरे गटाचे उमेदवार राजन विचारे आणि मनसेचे उमेदवार अविनाश जाधव यांच्यात तिरंगी लढत होती. या निवडणुकीत संजय केळकर यांना १ लाख २० हजार ४२४ मते मिळाली. ठाकरे गटाचे उमेदवार राजन विचारे यांना ६२ हजार १४१ मते तर, मनसेचे उमेदवार अविनाश जाधव यांना ४२ हजार ८०७ इतकी मते मिळाली. या निवडणुकीत केळकर हे ५७ हजार २२८ मताधिक्य घेत विजय संपादन केला.
हेही वाचा…वाहतूक कोंडी टाळण्यासाठी डोंबिवली पश्चिमेतील गुप्ते, फुले रोड एक दिशा मार्ग
ठाणे शहर विधानसभा मतदार संघामध्ये ठाणे महापालिकेचे एकूण नऊ प्रभाग येतात. यामध्ये हिरानंदानी इस्टेट भागातील प्रभाग क्रमांक २, मानपाडा, कोलशेत भागातील प्रभाग क्रमांक ३, कापुरबावडी, हिरानंदनी मेडोज भागातील प्रभाग क्रमांक ४, बाळकुम भागातील प्रभाग क्रमांक ८, राबोडी भागातील प्रभाग क्रमांक १०, गोकुळनगर भागातील प्रभाग क्रमांक ११, पाचपाखाडी, टेकडीबंगला, सिद्धेश्वर तलाव परीसरातील प्रभाग क्रमांक १२, नौपाडा भागातील प्रभाग क्रमांक २१ आणि खारकरआळी, टेंभीनाका भागातील प्रभाग क्रमांक २२ यांचा समावेश आहे. संजय केळकर यांना प्रभाग क्रमांक २ मध्ये १० हजार ४४२, प्रभाग क्रमांक ३ मध्ये ४ हजार ५६३, प्रभाग क्रमांक ४ मध्ये ७ हजार २०१, प्रभाग क्रमांक ८ मध्ये ९ हजार ७४०, प्रभाग क्रमांक ११ मध्ये ७ हजार ३५९, प्रभाग क्रमांक १२ मध्ये ६ हजार १६, प्रभाग क्रमांक २१ मध्ये ११ हजार २८९ आणि प्रभाग क्रमांक २२ मध्ये ८ हजार ९९३ असे मताधिक्य मिळाले. तर, ठाकरे गटाचे उमेदवार राजन विचारे यांना मुस्लिम बहुल मतदार असलेल्या राबोडी येथील प्रभाग क्रमांक १० मध्ये ८ हजार ५५७ इतके मताधिक्य मिळाले आहे. हा प्रभाग वगळता त्यांना कुठेही मताधिक्य मिळालेले नाही.
मताधिक्य आकडेवारी
| प्रभाग क्रमांक | संजय केळकर | राजन विचारे | अविनाश जाधव |
| प्रभाग क्रमांक -२ | १५,५५७ | ५,११५ | ४,११७ |
| प्रभाग क्रमांक -३ | ११,५२१ | ६,९५८ | ५,३०९ |
| प्रभाग क्रमांक -४ | ११,५२२ | ४,३२१ | २,१५० |
| प्रभाग क्रमांक -८ | १५,३६६ | ५५०३ | ५,६२६ |
| प्रभाग क्रमांक -१० | ५,६१९ | १४,१७६ | २,८९५ |
| प्रभाग क्रमांक -११ | १४,५९२ | ७,२३३ | ५,२३९ |
| प्रभाग क्रमांक -१२ | १३,६६१ | ६,७१३ | ७,६४५ |
| प्रभाग क्रमांक -२१ | १५,७१९ | ४,४३० | ४,२१३ |
| प्रभाग क्रमांक -२२ | १६,२३२ | ७,२३९ | ५,३५५ |
| पोस्टल | ६३५ | ४५३ | २५८ |
| एकूण | १,२०,४२४ | ६२,१४१ | ४२,८०७ |
