कल्याण : कल्याण पूर्व भागात राहत असलेल्या एका १२ वर्षाच्या अल्पवयीन मुलीबरोबर अश्लील चाळे करणाऱ्या एका तरुणाला आणि त्याला साथ देणाऱ्या बहिणीला कोळसेवाडी पोलिसांनी अटक केली आहे. महिनाभरातील कल्याण पूर्वेतील ही अशाप्रकारची चौथी घटना आहे. कल्याण पूर्वेत अशा घटनांमध्ये वाढ झाल्याने रहिवाशांमध्ये चिंतेचे वातावरण आहे. अजय थापा (२०) आणि सपना थापा (२४) अशी अटक करण्यात आलेल्या बहिण-भावांची नावे आहेत.
पोलिसांनी सांगितले, पीडित मुलगी राहत असलेल्या भागात आरोपी अजय, सपना थापा हे बहिण भाऊ राहतात. ही दोन्ही कुटुंब एकमेकांना ओळखतात. अजयची अनेक दिवसांपासून पीडित मुलीवर नजर होती. शनिवारी ही मुलगी आपल्या घराच्या परिसरात खेळत होती. त्यावेळी अजयने या मुली जवळ जाऊन तिच्या बरोबर अश्लील चाळे करणे सुरू केले. हा प्रकार पाहून पीडित मुलगी भयभीत झाली.
हेही वाचा : गणेशोत्सव मंडळांनी अधिकृत मीटरमधूनच वीज जोडणी घ्यावी, ठाणे महापालिका आयुक्तांच्या गणेशोत्सव मंडळांना सूचना
अजय पीडिते बरोबर अश्लील चाळे करत असताना त्याला रोखण्या ऐवजी त्याची बहिण सपना त्याला साथ देत होती. अजय पीडितेबरोबर जे अश्लील चाळे करत होता याचे मोबाईल चित्रण सपनाने काढले. अल्पवयीन मुलीला हा प्रकार सहन न झाल्याने तिने घरी गेल्यानंतर आपल्या आई, वडिलांना अजयने केलेला घडला प्रकार सांगितला. त्यांनी तात्काळ कोळसेवाडी पोलीस ठाण्यात जाऊन अजय, सपना थापा यांच्याविरुध्द तक्रार केली. पोलिसांनी आरोपी भाऊ, बहिणी विरुध्द विनयभंग, बाल लैंगिक अत्याचार प्रतिबंधक कायद्याने गुन्हा दाखल केला आहे. वरिष्ठ पोलीस निरीक्षक महेंद्र देशमुख यांच्या आदेशावरुन पोलिसांनी तात्काळ आरोपींना अटक केली. आरोपींचे वडिल एका कंपनीत तर आई एका बँकेत मोठ्या पदावर कार्यरत आहे.
