राष्ट्रीय स्पर्धेत ठाण्याच्या श्रद्धा, अक्षयाचे सुयश

आंतरमहाविद्यालयीन कबड्डी स्पर्धेचे आयोजन
प्रतिनिधी, डोंबिवली
प्रगती महाविद्यालय माजी विद्यार्थी असोसिएशन डोंबिवली पूर्व आणि एन. वाय. के. एस. खेळ मंत्रालय भारत सरकार यांच्या वतीने प्रगती करंडक या आंतरमहाविद्यालयीन कबड्डी सामन्याचे आयोजन करण्यात आले आहे. या स्पर्धेत मुंबई विद्यापीठाच्या महाविद्यालयांचा सहभाग आहे. रविवार, १० जानेवारीला डी.एन.सी. शाळेच्या मैदानावर सकाळी ९ ते सायंकाळी ६ या वेळेत हे सामने भरणार आहेत.
शाळा महाविद्यालयातूनही कबड्डीचा प्रचार व प्रसार करण्यासाठी आम्ही प्रगती करंडक या नावाने कबड्डीचे सामने दरवर्षी भरविण्याचा निर्धार केला. यावर्षी हे सामने आंतरमहाविद्यालयीन स्तरावर भरविण्यात येत असून, आंतरमहाविद्यालयीन स्तरावर मॅटवरील कबड्डीचे सामने भरविण्यात येत आहेत.

ऑर्डनन्सतर्फे राष्ट्रीय वेटलिफ्टिंग स्पर्धाना सुरुवात
अंबरनाथ : ऑर्डनन्स फॅक्टरीतर्फे आंतर विभागीय वेटलिफ्टिंग, शरीरसौष्ठव स्पर्धेचे आयोजन करण्यात आले आहे. संपूर्ण देशातून ४२ कंपन्यांच्या पाच विभागातून १७०च्या वर स्पर्धक यात सहभागी होणार आहेत. बुधवारी सकाळी साडेनऊ वाजता कंपनीचे वरिष्ठ महाव्यवस्थापक विद्यासागर वर्मा यांच्या हस्ते स्पर्धेचे उद्घाटन होणार आहे. ८ जानेवारी रोजी सायंकाळी शरीरसौष्ठव स्पर्धा आणि पारितोषिक वितरण होणार असल्याचे ऑर्डनन्सचे व्यवस्थापक अश्विनीकुमार भाटी यांनी सांगितले.

राज्यस्तरीय हँडबॉलमध्ये मुंबई संघाची बाजी
वार्ताहर, वाडा
वाडा येथे झालेल्या ३२व्या सब ज्युनियर राज्यस्तरीय हँडबॉल स्पर्धेत मुंबई जिल्हा संघाने सोलापूर संघावर मात करून प्रथम क्रमांक पटकविला, तर सोलापूर संघ उपविजेता ठरला. या स्पर्धेत महाराष्ट्रातून एकूण २९ संघ सहभागी झाले होते. वाडा येथील स्वामी विवेकानंद विद्यालयाच्या प्रांगणात २९ ते ३१ डिसेंबर दरम्यान या स्पर्धा झाल्या. या स्पर्धाचे उद्घाटन आदिवासी विकास मंत्री विष्णू सावरा यांच्या हस्ते झाले, तर बक्षीस समारंभ शिवसेना उपनेते आनंत तरे यांच्या हस्ते करण्यात आले.

समीर पाटीलची सागरी मोहीम फत्ते
प्रतिनिधी, ठाणे
अवघ्या दोन वर्षांपूर्वी पोहायला शिकलेल्या ३५ वर्षीय समीर पाटीलने धरमतर ते गेटवे ऑफ इंडिया हे ३६ किलोमीटरचे अंतर ९ तास १ मिनिटात पोहून पूर्ण करत सागरी जलतरण मोहीम फत्ते केली. समीरने नव-वर्षांच्या पूर्वसंध्येला १२ अंश सेल्सियस तापमान असलेल्या पाण्यात पहाटे ३.२० वाजता धरमतरपासून पोहण्यास सुरुवात केली. दाट धुके आणि समुद्रातील पाण्याचा बदलता प्रवाह यावर मात करत समीरने दुपारी १२ वाजून १ मिनीट झाले असताना गेटवे ऑफ इंडियाच्या पायऱ्यांना हात लावला.
टाटा कन्सल्टन्सी सव्‍‌र्हिसेसमध्ये नोकरी करणाऱ्या समीरने दोन वर्षांपूर्वी ठाण्यातील किरण पाठक आणि सुजीत पवार यांच्या मार्गदर्शनाखाली पोहायला शिकायला सुरुवात केली. त्यानंतर साहसी सागरी जलतरण करण्याचा निर्णय पक्का करत समीरने रोज किमान चार तास पोहण्याचा सराव सुरू ठेवला. या मोहिमेच्या आधी समीरने एलिफंटा ते गेटवे ऑफ इंडिया, गोव्यात झालेली २५ किलोमीटर अंतराची स्विमथोन स्पर्धा, नौदलाच्या सागरी जलतरण स्पर्धेत आपला दम अजमावला होता. समीरच्या या यशाबद्दल ठाणे शहरातून त्याचे कौतुक केले जात आहे.

पाचवीतल्या हेजलची आशियाई कराटे स्पर्धेत पदकांची लूट
प्रतिनिधी, ठाणे
हैदराबाद येथे नुकत्याच पार पडलेल्या आशियाई
कराटे विजेतेपद स्पर्धेत ठाण्यातील सुलोचनादेवी सिंघानिया शाळेच्या हेजल जॉन मॅथ्यू या
पाचवीत शिकणाऱ्या मुलीने तिच्या वयोगटात सुवर्ण व कांस्य अशी दुहेरी पदके मिळवली आहेत. या
स्पर्धेत भारतासह सर्वच आशियाई देश सहभागी
झाले होते. यात हेजल हिने दोन लढतींमध्ये ही कामगिरी केली. हेजल पहिलीपासूनच कराटे खेळत असून तिने यापूर्वी झालेल्या तीन राज्यस्तरीय स्पर्धामध्ये पदके मिळवली होती. तिने दुहेरी पदक मिळवल्याबद्दल शाळेकडून तिचे कौतुक करण्यात आले.

– संकेत सबनीस