अंबरनाथः राज्यातील विविध जिल्ह्यांमध्ये पाच शासकीय वैद्यकीय महाविद्यालय आणि रुग्णालयाच्या बांधकामासाठी राज्याच्या वैद्यकीय शिक्षण विभागाने निविदा जाहीर केल्या आहेत. यात अंबरनाथच्या शासकीय वैद्यकीय महाविद्यालय आणि रुग्णालयाचाही समावेश आहे. एकूण ४०३ कोटींच्या खर्चातून महाविद्यालय आणि रुग्णालयाची वास्तू उभी केली जाणार असून अंबरनाथ वैद्यकीय शिक्षणाच्या परिघावर नवे केंद्र म्हणून उदयास येणार आहे.
अंबरनाथ शहरातील कै. बी. जी. छाया रुग्णालय एकेकाळी अंबरनाथसह आसपासच्या ग्रामीण भागातील रुग्णांसाठी मोठा आधार होते. मधल्या काळात राज्य शासन, स्थानिक अंबरनाथ नगरपालिका प्रशासन यांच्याकडे झालेल्या हस्तांतरणाच्या प्रक्रियेत रुग्णालयाच्या सक्षमीकरणाकडे दुर्लक्ष झाले होते. सध्या या रुग्णालयात विविध सुविधा देण्यासाठी प्रयत्न सुरू आहेत. मात्र त्याचवेळी अंबरनाथसारख्या शहरात शासकीय वैद्यकीय महाविद्यालय आणि रुग्णालय असावे अशी अनेक वर्षांची मागणी होती. स्थानिक खासदार डॉ. श्रीकांत शिंदे, आमदार डॉ. बालाजी किणीकर हे दोघेही वैद्यकीय क्षेत्राची पार्श्वभूमी असलेले असल्याने त्यांच्याकडून याबाबत पाठपुराव्याची आशा होती. या दोघांच्या पाठपुराव्यामुळे अंबरनाथच्या शासकीय वैद्यकीय महाविद्यालय आणि रुग्णालयाला मंजुरी मिळवण्यात यश आले होते. त्यानंतर अंबरनाथ पूर्वेतील शेतकी सोसायटीच्या भूखंडावर या महाविद्यालय आणि रुग्णालयाच्या उभारणीसाठी जागेचे सर्वेक्षण पूर्ण करण्यात आले. सर्व प्रक्रिया पूर्ण केल्यानंतर आता या महाविद्यालय आणि रुग्णालयाच्या प्रत्यक्ष बांधकामासाठी प्रकल्प व्यवस्थापन सल्लागार नेमण्यासाठी राज्याच्या वैद्यकीय शिक्षण व संशोधन विभागाने ४०३ कोटी ८९ लाख रुपयांची मर्यादित स्वरुपाची निविदा जाहीर केली आहे.
राज्यातील पाच शासकीय वैद्यकीय महाविद्यालय आणि रुग्णालयांच्या उभारणीसाठी ही एकत्रित निविदा जाहीर करण्यात आली असून या एकत्र निविदेची रक्कम २ हजार १९ कोटी ४५ लाख इतकी आहे. केंद्र सरकारच्या अंगीकृत आठ कंपन्यांकडून या कामासाठी निविदा मागवण्यात आल्या आहेत. त्यामुळे अंबरनाथ शहरातील शासकीय वैद्यकीय महाविद्यालय आणि रुग्णालयाच्या उभारणीला गती मिळाली आहे. या महाविद्यालयाच्या उभारणीपूर्वीच येथील प्रवेश प्रक्रिया सुरू करण्यात आली असून अंबरनाथ पालिकेच्या अख्यत्यारितील रुग्णालयाच्या वास्तूमध्ये अभ्यासक्रम सुरू करण्यात येतो आहे. या महाविद्यालयाच्या उभारणीनंतर वैद्यकीय शिक्षणाच्या परिघावर अंबरनाथ शहर नवे केंद्र म्हणून नावारुपाला येणार आहे.
हेही वाचा – डोंबिवलीचं ‘धगधगतं’ वास्तव; टाईमबॉम्बच्या वातीवर वसलेलं शहर!
४३० खाटा, तर १०० विद्यार्थी क्षमता
अंबरनाथच्या शासकीय वैद्यकीय महाविद्यालयात १०० विद्यार्थांना दरवर्षी प्रवेश दिला जाणार आहे. तर त्याचवेळी येथील रुग्णालयात ४३० खाटा असणार आहेत. त्यामुळे रुग्णांनाही मोठा दिलासा मिळणार आहे.
