ठाणे : ठाणे महापालिका क्षेत्रात मोघरपाडा जवळ खाडी किनारी २६० मीटर उंचीची प्रेक्षक गॅलरी उभारणीचा निर्णय प्रशासनाने घेतला आहे. याशिवाय, कन्व्हेंक्शन सेंटर, शॉपिंग मॉल, कार्यालये आदीचा त्या क्षेत्रात विकास होणार आहे. प्रस्तावित प्रकल्प आर्थिकदृष्ट्या व्यवहार्य कसे होतील, यावर महापालिका मुख्यालयात महत्वाची बैठक पार पडली.
ठाणे महापालिका क्षेत्रात प्रस्तावित असलेल्या प्रेक्षक गॅलरी आणि कन्व्हेंक्शन सेंटर, कोलशेत येथील टाऊन पार्क, कळव्यातील यशवंत रामा साळवी तरण तलावाची नव्याने बांधणी, खारेगाव येथे प्रस्तावित नवीन नाट्यगृह आदी प्रकल्पांच्या सद्यस्थितीचा आढावा बुधवारी घेण्यात आला. या बैठकीसाठी, खासदार श्रीकांत शिंदे, खासदार नरेश म्हस्के, आमदार जितेंद्र आव्हाड, महापालिका आयुक्त सौरभ राव, जिल्हाधिकारी अशोक शिनगारे, अतिरिक्त आयुक्त प्रशांत रोडे, नगर अभियंता प्रशांत सोनाग्रा, माजी नगरसेवक गोपाळ लांडगे, राम रेपाळे, रमाकांत मढवी, नजीब मुल्ला तसेच जिल्हा प्रशासन आणि महापालिकेचे वरिष्ठ अधिकारी उपस्थित होते.
मोघरपाडा येथे २६० मीटर उंचीची प्रेक्षक गॅलरी, कन्व्हेन्शन सेंटर, हॉटेल, गोल्फ कोर्स, मॉल, कार्यालये, कला दालने असा सुमारे ८००० कोटी रुपयांचा प्रकल्प प्रस्तावित आहे. त्यासाठी लागणारी एकूण जागा, त्यापैकी ताब्यातील जागा आदी स्थितीची माहिती प्रशासनाने बैठकीत दिली. हा प्रकल्प आर्थिकदृष्ट्या पूर्णपणे व्यवहार्य झाला पाहिजे. त्याप्रमाणे त्याची आखणी करावी. स्थानिक गरजा काय आहेत, याचा अभ्यास केला जावा, अशी सूचना खासदार श्रीकांत शिंदे यांनी यावेळी केली.
त्याचबरोबर, कोलशेत येथे २२ एकर जागेवर क्रीडा संकुल, मत्स्यालय, सायन्स सेंटर, तारांगण, व्यावसायिक वापराची जागा असे टाऊन पार्क प्रस्तावित आहे. त्यासाठी, ६०० कोटी रुपयांचा खर्च अपेक्षित आहे. त्याचेही सादरीकरण या बैठकीत झाले. तसेच, कळवा येथील यशवंत रामा साळवी तरण तलाव पूर्ण पाडून नव्याने बांधण्यात यावा. त्यात, तलाव, प्रेक्षागृह, इतर खेळांच्या सुविधा आदीची रचना केली जावी. त्याचा विस्तृत आराखडा सादर करावा. कळवा परिसरातील नागरिकांसाठी तिथे उत्तम सुविधा निर्माण झाली पाहिजे, असेही खासदार श्रीकांत शिंदे यांनी स्पष्ट केले.
कल्याण लोकसभा मतदारसंघातीस वेगवेगळ्या प्रश्नांसाठी खासदार डाॅ.श्रीकांत शिंदे हे नेहमीच पुढाकार घेत असतात. कळवा परिसरातील काही प्रकल्पांची आखणी यानिमीत्ताने केली जात असल्याने खासदार शिंदे महापालिका मुख्यालयात आले होते. असे असताना त्यांनी मोघरपाडा, कोलशेत भागातील प्रकल्पांचाही आढावा घेतल्याने कल्याण पाठोपाठ ठाणे महापालिका हद्दीतील विकास प्रकल्पांच्या अंमलबजावणीची सुत्रही खासदार शिंदे यांनी आपल्या हाती घेतल्याची चर्चा रंगली आहे.
