ठाणे: ठाण्यात हुक्का पार्लरविरोधात पुन्हा एकदा कारवाईची शक्यता व्यक्त केली जात आहे. शहरातील अनेक भागात हुक्का पार्लर अद्यापही छुप्या पद्धतीने सुरू आहे. मागील वर्षी हुक्का पार्लर विरोधात आंदोलन झाल्यानंतर या हुक्का पार्लरवर काही प्रमाणात लगाम बसला आहे. परंतु ४० टक्के हुक्का पार्लर शहरात सुरू असल्याचा आरोप भाजपचे आमदार संजय केळकर यांनी केला आहे. हुक्का पार्लर व्यवसायावर बंदी असूनही शहरात हुक्का पार्लर व्यवसायिकांवर गुन्हे दाखल होत नसल्याची खंतही त्यांनी सभागृहात व्यक्त केली. यावर गृह राज्यमंत्री योगेश कदम यांनी शहरात शोधमोहिम सुरू करून ठोस कारवाई करण्याचे आदेश तत्काळ देण्यात येतील, असे सांगितले. त्यामुळे आता हुक्का पार्लर विरोधात मोठी कारवाई होण्याची शक्यता व्यक्त केली जात आहे.
ठाणे शहरात तरुण पिढी हुक्का पार्लर संस्कृतीमुळे उद्ध्वस्त होण्याच्या मार्गावर आहे. हुक्का पार्लरमुक्त ठाणे शहरासाठी लोकचळवळ उभारली आणि त्यास यशही मिळाले. पोलिसांनी कारवाया केल्याने ६० टक्के हुक्का पार्लर बंद झाले, पण अद्याप ४० टक्के पार्लर सुरू असल्याची माहिती आमदार संजय केळकर यांनी सभागृहात दिली.
हुक्का पार्लर व्यवसायावर बंदी असून याबाबत गुन्हे दाखल केले तर तीन वर्षाची शिक्षा आहे, परंतु शहरात हुक्का पार्लर सुरू आहेत. हर्बलच्या नावाखाली देखील हुक्का पार्लर सुरू आहेत. एवढेच नव्हे तर परमिट रूमच्या मागे देखील हा व्यवसाय सुरू आहे. यामुळे तरुण पिढी मोठ्या प्रमाणात व्यसनाच्या आहारी जात आहे. समाज माध्यमांवर तर छुप्या आकर्षक जाहिराती प्रसारित केल्या जात असून त्या ठिकाणी गेल्यावर हुक्का पार्लर असल्याचे आढळून येते. या हुक्का चालकांना व्यवसाय बंद करण्याची पोलिसांकडून फक्त समज दिली जाते पण या व्यवसायावर ठोस कारवाई करण्यात पोलीस कुचराई करत असल्याचे संजय केळकर यांनी सांगितले.
ठाणेकर तरुणांना देशोधडीस लावणारे हे हुक्का पार्लर कायमस्वरूपी बंद न करण्यामागे कोणते राजकारण आणि अर्थकारण आहे. त्यामुळे शहरात कॉम्बिंग ऑपरेशन करून हे व्यवसाय बंद करण्यात येतील का, असा प्रश्न केळकर यांनी उपस्थित केला. यावर उत्तर देताना गृह राज्यमंत्री योगेश कदम यांनी ठाणे शहरात शोध मोहीम सुरू करून हुक्का पार्लर बंद करण्याचे आदेश आजच देण्यात येतील, असे सांगितले. या आदेशामुळे आता हुक्का व्यवसाय करणाऱ्यांचे धाबे दणाणले आहेत.
