ठाणे : ठाणे शहराला पाणी पुरवठा करणाऱ्या महाराष्ट्र औद्योगिक विकास महामंडळाकडून जलवाहीनी दुरुस्तीचे काम हाती घेण्यात येणार आहे. या कामामुळे ठाणे शहरातील काही भागांसह दिवा, कळवा, मुंब्रा भागाचा पाणीपुरवठा आज, शुकवारी चोवीस तास बंद राहणार आहे. ठाणे महापालिका क्षेत्रात चार स्त्रोतांमार्फत दररोज ५८५ दशलक्षलीटर इतका पाणी पुरवठा करण्यात येतो. त्यापैकी महाराष्ट्र औद्योगिक विकास महामंडळाकडून १३५ दशलक्षलीटर इतका पाणी पुरवठा करण्यात येतो. या पाण्याचा पुरवठा मुंब्रा, दिवा, कळवा, माजिवडा- मानपाडा आणि वागळे इस्टेटमधील काही भागात केला जातो. महाराष्ट्र औद्योगिक विकास महामंडळाच्या पाणीपुरवठा योजनेच्या अंतर्गत बारवी गुरूत्व वाहिनीचे कटाई नाका ते शीळ टाकी येथे तातडीचे दुरूस्तीचे काम हाती घेण्यात येणार आहे. या कामामुळे महामंडळाकडून ठाणे महापालिका क्षेत्रात होणारा पाणी पुरवठा आज शुकवार, २० सप्टेंबर रोजी चोवीस तासांसाठी बंद राहणार आहे. या बंदमुळे ठाणे महापालिका क्षेत्रातील दिवा, कळवा, मुंब्रा (प्रभाग क्र. २६ व ३१ चा काही भाग वगळता) आणि वागळे प्रभाग समिती मधील रुपादेवी पाडा, किसननर नं. २, नेहरुनगर तसेच मानपाडा प्रभाग समितीमधील कोलशेत खालचा गाव येथील पाणीपुरवठा २४ तासासाठी पूर्णपणे बंद राहील. या बंदमुळे पुढील एक ते दोन दिवस कमी दाबाने पाणी पुरवठा होणार आहे. यामुळे या भागांमध्ये पाणी टंचाईची समस्या निर्माण होण्याची शक्यता आहे.
