ठाण्यात तलावांच्या सुशोभीकरणाचा मार्ग मोकळा

ठाणे शहरातील सहा तलावांचे संवर्धन आणि सुशोभीकरण करण्याच्या प्रस्तावास राज्य शासनाच्या सुकाणू समितीने गुरुवारी मान्यता दिली असून या प्रस्तावानुसार तलावांच्या संवर्धन व सुशोभीकरणासाठी मोठय़ा प्रमाणात निधी उपलब्ध होणार आहे. शहरातील तलावांच्या संवर्धन व सुशोभीकरणासाठी राज्यशासनामार्फत निधी उपलब्ध व्हावा, म्हणून कोकण पदवीधर मतदारसंघाचे आमदार निरंजन डावखरे यांनी महापालिकेला एक प्रस्ताव सादर केला. त्यानुसार, महापालिकेने शहरातील सहा तलावांच्या संवर्धन व सुशोभीकरण करणासंबंधीचा प्रस्ताव राज्य शासनाच्या पर्यावरण विभागाला पाठविला. यामध्ये ठाणे शहरातील मासुंदा व जेल तलाव, घोडबंदरमधील तुर्भेपाडा व नार तलाव, हरिओमनगरमधील तलाव आणि कावेसरमधील तलाव, अशा सहा तलावांचा समावेश होता. राज्य शासनाच्या तलाव संवर्धन सुकाणू समितीची गुरुवारी बैठक झाली. यामध्ये या प्रस्तावाला मान्यता देण्यात आली.