ठाणे : मानसिक स्थिती स्थिर नसलेल्या वयोवृद्धेचे सोन्याचे दागिने गहाळ; पोलिसांच्या प्रयत्नानंतर दागिने कुटुंबाला मिळाले परत

मुंब्रा येथील तन्वरनगर भागात वयोवृद्ध महिला राहते. १२ डिसेंबरला दुपारी अचानक त्या घरातून बाहेर पडून कुठेतरी निघून गेल्या होत्या. या घनटेनंतर महिलेच्या पतीने याप्रकरणी मुंब्रा पोलीस ठाण्यात तक्रार दाखल केली. त्याआधारे,याप्रकरणी त्या हरविल्या असल्याची तक्रार नोंदविण्यात आली होती. दरम्यान, याप्रकरणाचा समांतर तपास ठाणे गुन्हे अन्वेषण शाखा एकच्या पथकाकडून सुरू होता. युनीट एकचे वरिष्ठ पोलीस निरीक्षक दीलीप पाटील, पोलीस निरीक्षक कृष्णा कोकणी यांनी याप्रकरणाच्या तपासासाठी पथके तयार केली. तपासावेळी महिला घरातील १९५ ग्रॅम वजनाचे आणि ११ लाख रुपयांहून अधिक किमतीचे सोन्याचे दागिने घरातून घेऊन निघून गेल्याचे समोर आले. तसेच महिलेची मानसिक स्थितीही स्थिर नसल्याची माहिती पथकाला प्राप्त झाली. त्यानंतर पोलिसांनी तिचा शोध सुरू केला असता, ती दुसऱ्या दिवशी रात्री तिच्या ठाण्यातील उथळसर येथील नातेवाईकांच्या घरी गेल्याचे निष्पन्न झाले.

हेही वाचा >>> ठाणे पश्चिम स्थानक परिसरातील फेरीवालामुक्त करा; महापालिका आयुक्त अभिजीत बांगर यांचे आदेश

तिच्या नातेवाईकांनी याची माहिती महिलेच्या पतीला दिल्यानंतर पोलिसांच्या पथकाने महिलेला ताब्यात घेतले. तसेच तिची विचारपूस करून तिच्याकडील दागिन्याबाबत माहिती घेतली. परंतु तिला काहीच सांगता येत नव्हते. दागिन्यांच्या तपासासाठी पोलिसांनी खबऱ्यांचे जाळे पसरविले. त्यावेळी ही महिला १३ डिसेंबरला दुपारी ऋतु पार्क येथील एका दुकानाजवळ बसून होती, अशी माहिती पोलिसांना मिळाली. पोलिसांनी परिसरातील सीसीटीव्ही तपासले त्यावेळी तिची सोन्याच्या दागिन्यांनी भरलेली पिशवी एका व्यक्तिला आढळून आल्याचे चित्रीकरण दिसले. त्यानुसार पोलिसांनी त्या व्यक्तीचा शोध घेऊन त्याच्याकडील दागिने घेतले. हे सर्व दागिने पोलिसांनी महिलेच्या पतीला दिले. दागिने परत मिळताच महिलेच्या पतीने पोलिसांचे आभार मानले.