बदलापूर: ठाणे आणि पुणे जिल्ह्यांच्या सीमेवर असलेल्या निसर्गरम्य माळशेज घाटात उभारण्यात येणारा काचेचा स्कायवॉक हा सार्वजनिक खासगी भागीदारीतून उभारण्याचे संकेत राज्याचे उपमुख्यमंत्री अजित पवार यांनी दिले आहेत.
माळशेज येथील महाराष्ट्र पर्यटन विकास महामंडळाच्या विश्रामगृहाजवळील टेकडीवर हा काचेचा स्कायवॉक उभारण्यात येणार आहे. या प्रकल्पासाठी सार्वजनिक-खासगी भागीदारी तत्त्वावर एक महिन्याभरात एकत्रित प्रस्ताव सादर करण्याचे निर्देश त्यांनी दिले. ठाणे जिल्ह्यातील पर्यटनासाठी हा प्रकल्प महत्वाकांक्षी आहे.
ठाणे जिल्ह्यातील माळशेज घाट हा बारमाही पर्यटकांना खुणावतो. पावसाळी पर्यटन हा या भागातील हक्काचा आणि जमेचा पर्यटन काळ आहे. या भागातील पर्यटनाला चालना मिळावी यासाठी मुरबाड विधानसभा मतदारसंघाचे आमदार किसन कथोरे यांनी विविध प्रयत्न केले. यात माळशेज घाटात देशातील सर्वात मोठा काचेचा पूल उभारून पर्यटनाला चालना द्यावी यासाठी आमदार किसन कथोरे प्रयत्नशील होते.
काही महिन्यांपूर्वी सादर झालेल्या अर्थसंकल्पात या प्रकल्पाची घोषणा करण्यात आली होती. त्यामुळे या प्रकल्पाला गती मिळाल्याची चर्चा होती.त्यातच सोमवारी मंत्रालयातील समिती कक्षात उपमुख्यमंत्री अजित पवार यांच्या अध्यक्षतेखाली बैठक झाली. यावेळी मुंबई, पुणे, ठाणे, नाशिक आणि अहमदनगरसारख्या प्रमुख शहरांजवळ असल्याने माळशेज घाटात स्कायवॉक उभारल्यास पर्यटनाला मोठी चालना मिळेल, असे अजित पवार म्हणाले.
जवळच शिवनेरी किल्ला, हरिश्चंद्रगड, धबधबे व पिंपळगाव जोगा धरण यांसारखी पर्यटनस्थळे असल्याने पर्यटकांचा मोठ्या प्रमाणावर ओघ वाढेल. त्यामुळे या प्रकल्पाला गती देण्याची गरज पवार यांनी व्यक्त केल्याची माहिती आमदार किसन कथोरे यांनी दिली आहे.उपमुख्यमंत्र्यांनी सार्वजनिक बांधकाम (राष्ट्रीय महामार्ग) विभागाला प्रकल्पाची आर्थिक व्यवहार्यता तपासून प्रस्ताव सादर करण्याचे निर्देश दिले. तसेच, स्कायवॉक प्रकल्प उभारताना पर्यावरणीयदृष्ट्या संवेदनशील भाग वगळण्याचे आणि वनविभागाचा अभिप्राय विचारात घेऊन पर्यायी जागा उपलब्ध करून देण्याचे आदेशही ठाणे जिल्हाधिकाऱ्यांना दिले.
या बैठकीस आमदार किसन कथोरे, वित्त विभागाचे अपर मुख्य सचिव ओ. पी. गुप्ता, नियोजन विभागाचे अपर मुख्य सचिव डॉ. राजगोपाल देवरा, पर्यटन विभागाचे प्रधान सचिव अतुल पाटणे, उपमुख्यमंत्र्यांचे सचिव राजेश देशमुख, सार्वजनिक बांधकाम विभागाचे सचिव संजय दशपुते, ठाण्याचे जिल्हाधिकारी अशोक शिनगारे, तसेच इतर संबंधित अधिकारी उपस्थित होते.
जागतिक दर्जाचे पर्यटन केंद्रकाचेच्या स्कायवॉक उभारल्याने माळशेज हे जगाच्या नकाशावर येणार आहे. हा काचेचा स्कायवॉक हा देशातील सर्वात मोठा स्कायवॉक असणार आहे. यामुळे आसपासच्या भागाला पर्यटनदृष्ट्या विकसित करण्याची संधी मिळेल. तसेच रोजगार संधीही वाढतील, असा विश्वासआमदार किसन कथोरे यांनी व्यक्त केला आहे.
