करोनातील टाळेबंदीमुळे रखडलेल्या म्हाडा घरांच्या वाटपामुळे लाभार्थ्यांची आर्थिक कोंडी झाली. त्यामुळे नुकसानभरपाई म्हणून या लाभार्थ्यांना शेवटचा १० टक्क्यांचा हफ्ता माफ करावा अशी मागणी होती. अखेर म्हाडाच्या नुकत्याच झालेल्या बैठकीत खोणी आणि शिरढोणच्या लाभार्थ्यांना १० टक्क्यांचा शेवटचा हफ्ता माफ करण्याचा निर्णय घेण्यात आला आहे. सुमारे २ हजार लाभार्थ्यांना याचा फायदा होणार आहे. खासदार डॉ. श्रीकांत शिंदे यांनी यासाठीची मागणी केली होती.
हेही वाचा- ठाणे : रस्ते रुंदीकरणासाठी अतिक्रमणांवर हातोडा, उल्हासनगर महापालिकेची कारवाई
कल्याण तालुक्यातील खोणी आणि शिरढोण तालुक्यात परवडणाऱ्या दरातील घरे उभारण्यात आली होती. या घरांसाठीची २०१८ साली सोडत काढण्यात आली होती. तर २०२१ पर्यंत विजेत्यांना घराचा ताबा देणे अपेक्षित होते. मात्र करोना टाळेबंदीत हे काम रखडले. त्यामुळे लाभार्थ्यांना घरांचा ताबा मिळाला नाही. त्याचवेळी या घरांच्या कर्जापोटी लाभार्थ्यांना बँकांचे हफ्ते भरावे लागत होते.
हेही वाचा- ठाणे : कामगार नेते राजन राजे यांच्या धर्मराज्य पक्ष कार्यालयात चोरीचा प्रयत्न
एकीकडे ताबा न मिळालेल्या घरांचा हफ्ता तर दुसरीकडे ज्या घरात भाड्याने राहतो त्या घराचे भाडे अशा दुहेरी आर्थिक कोंडीमध्ये हे लाभार्थी अडकले होते. त्यातच करोनामुळे नागरिकांचे आर्थिक गणित कोलमडल्याने लाभार्थ्यांचे हाल सुरू होते. या लाभार्थ्यांना दिलासा देण्यासाठी घराचा शेवटचा हफ्ता माफ करण्यात यावा अशी मागणी कल्याण लोकसभा मतदार संघाचे खासदार डॉ. श्रीकांत शिंदे यांनी म्हाडा प्रशासनाकडे केली होती. नुकत्याच झालेल्या म्हाडाच्या बैठकीत याबाबतचा ठराव मंजूर करण्यात आला आहे. त्यामुळे येथील दोन हजार लाभार्थ्यांना याच थेट फायदा होणार आहे. म्हाडा प्रशासनाने घेतलेल्या या निर्णयामुळे खोणी आणि शिरढोन प्रकल्पातील प्रत्येक विजेत्याचे १ लाख ६३ हजार रुपयांनुसार ३२ कोटी ६२ लाख रुपये वाचले आहेत
