कल्याण : दरवाजात उभे राहून प्रवास करणाऱ्या लोकल प्रवाशांच्या हातावर काठीने, लोखंडी सळईने फटका मारायचा. त्यांच्या हातामधील पिशवी, मोबाईल रेल्वे मार्गात पडला की तो उचलून पळून जायचा. अशा पध्दतीने आंबिवली रेल्वे मार्ग भागात प्रवाशांना लुटणाऱ्या एका चोरट्याला कल्याण लोहमार्ग पोलिसांनी अटक केली आहे. संदीप प्रसाद असे आरोपीचे नाव आहे. झटपट श्रीमंत होण्यासाठी तो हे उद्योग करत असल्याचे पोलीस तपासात उघड झाले आहे.
आंबिवली रेल्वे मार्ग भागात धावत्या लोकलमध्ये दरवाजात उभ्या असलेल्या महिला, पुरुषांच्या हातावर फटका मारुन त्यांच्या हातामधील मोबाईल, पर्स रेल्वे मार्गात पाडण्याचे प्रमाण वाढले होते. ही वस्तू रेल्वे मार्गात पडली की चोरटे ती उचलून घेऊन जात होते. लोकल धावती असल्याने प्रवाशांना रेल्वे मार्गात उतरण्याची सोय नव्हती. या चोरीच्या लोहमार्ग पोलीस ठाण्यात तक्रारी वाढत होत्या.
हेही वाचा…. अंबरनाथ: शेतकरी – एमआयडीसी वादात काटई कर्जत मार्गाची मार्गिका बंद
हेही वाचा…. कल्याणमध्ये मद्यपींकडून वाहनांची तोडफोड
कल्याण लोहमार्ग पोलीस ठाण्याचे वरिष्ठ पोलीस निरीक्षक मुकेश ढगे यांनी रेल्वे पोलिसांना आंबिवली भागात गस्त ठेवण्यास सांगितले होते. या भागात अशाप्रकारच्या चोऱ्या करणाऱ्यावर पाळत ठेवण्यास सांगितले. या कालावधीत चोरटा या भागात फिरकला नाही. परंतु, पोलिसांनी तांत्रिक माहिती, परिसरातील सीसीटीव्ही चित्रण तपासून संदीप प्रसाद याला अटक केली. त्यानेच लोकल प्रवाशांच्या हातावर काठी मारुन त्यांच्या हातामधील रेल्वे मार्गात पडलेल्या वस्तू उचलून चोरी केल्याची कबुली पोलिसांना दिली. त्याने आतापर्यंत किती ठिकाणी हे प्रकार केले आहेत याचा तपास लोहमार्ग पोलीस करत आहेत.
