लोकसत्ता खास प्रतिनिधी
कल्याण: शोभेचे दागिने खरेदी करण्याच्या बहाण्याने दुकानात येऊन एका महिला व्यावसायिकाला तीन भुरट्या महिलांनी एक लाख २३ हजाराला लुटले. खरेदीदार महिला दुकानातून निघून गेल्यावर व्यावसायिक महिलेच्या हा चोरीचा प्रकार निदर्शनास आला.
कल्याण पूर्वेतील शिवाजीनगर कोळसेवाडी भागातील प्राजक्ता कॉस्मेटिक या दुकानात गेल्या दोन आठवड्यापूर्वी दुपारच्या वेळेत हा प्रकार घडला. एक ४५ वर्ष, एक १३ वर्ष आणि एक चार वर्षाची मुलगी अशी आरोपी महिलांची ओळख आहे. प्राजक्ता अभिषेक पवार असे तक्रारदार महिलेचे नाव आहे.
आणखी वाचा-मनसैनिकांना उन्हातान्हात उभे करण्यापेक्षा राज ठाकरेंनी नेत्यांची भेट घ्यावी
पोलिसांनी सांगितले, प्राजक्ता यांचे कोळसेवाडी भागात कॉस्मेटिकचे दुकान आहे. दोन आठवड्यापूर्वी त्यांच्या दुकानात तीन महिला दुपारच्या वेळेत शोभेचे दागिने खरेदी करण्यासाठी आल्या. वेगळ्या प्रकारचे दागिने बघण्यास घेऊन या महिलांनी तक्रारदार प्राजक्ता यांना बोलविण्यात गुंतविले. यावेळी हातचलाखी करुन प्राजक्ता यांची नजर चुकवून दुकानातील गल्ल्याजवळ ठेवलेली एक काळ्या रंगाची पिशवी एका भुरट्या महिलेने चोरुन आपल्या ताब्यात घेतली. या पिशवीत सोन्या चांदीचे दागिने आणि रोख रक्कम होती.
आणखी वाचा-ठाणे: टोल दरवाढविरोधात मनसेचे साखळी आंदोलन
या महिला शोभेचे दागिने बघून गेल्यानंतर प्राजक्ता यांच्या दुकानात गल्ल्याजवळ ठेवलेली पिशवी गायब असल्याचे दिसले. त्यांनी दुकानात शोध घेतला. घरी चौकशी केली. त्यावेळी कोठेही पिशवी आढळून आली नाही. दुकानात आलेल्या तीन महिलांनीच ही पिशवी चोरुन नेल्याचा संशय व्यक्त करुन प्राजक्ता यांनी कोळसेवाडी पोलीस ठाण्यात याप्रकरणी तक्रार केली. हवालदार एम. एस. जाधव या प्रकरणाचा तपास करत आहेत.
