ठाणे : राज्यातील काही भागात झिका आजाराचा प्रादूर्भाव वाढू लागला असला तरी ठाणे जिल्ह्यात या आजाराचा अद्याप तरी एकही रुग्ण आढळून आलेला नाही, असा दावा ठाणे जिल्हा परिषदेचे आरोग्य विभाग प्रमुख डॉ. गंगाधर परगे यांनी केला आहे. रुग्ण आढळून आलेला नसला तरी नागरिकांनी विशेष करुन गरोदर महिलांनी आरोग्याची काळजी घ्यावी असे आवाहन त्यांनी केले आहे.
एडिस डास चावल्यामुळे झिका, डेंग्यू , चिकनगुनिया या आजारांचा प्रादूर्भाव वाढत असतो. राज्यातील काही जिल्ह्यांमध्ये झिका आजाराचा प्रादूर्भाव दिसून येत आहे. ठाणे जिल्ह्यात या आजाराचा प्रादूर्भाव पसरु नये यासाठी आरोग्य विभागाकडून विशेष उपाय योजना आखण्यात आल्या आहेत. गर्भवती महिलांना याचा सर्वाधिक धोका आहे. त्यामुळे आपल्या परिसरात डासांचा प्रादूर्भाव आहे की नाही याची तपासणी त्यांनी केली पाहिजे. तसेच हलक्या रंगाचे, सैल-फिटिंग कपडे घालावे. शक्यतो लांब बाही आणि हात व पाय झाकण्यासाठी मौजे याचा वापर करावा. पाण्याच्या ठिकाणी डासांचा प्रादूर्भाव मोठ्याप्रमाणात होत असतो. त्यामुळे घराच्या आत किंवा बाहेर पाणी जमा करून ठेवलेले सर्व कंटेनर रिकामे करावे किंवा झाकून ठेवावे. सर्व गर्भवती महिलांनी सक्रिय झिका संसर्ग असलेल्या भागात अनावश्यक प्रवास टाळावा, असे आवाहन डाॅ. परगे यांनी केले. वेळोवेळी गावागावात धुर फवारणी केली जात आहे. तसेच घरोघरी सर्वेक्षण देखील सुरु आहे, असेही ते म्हणाले.
