एप्रिलमध्ये कारवाईचा धडाका; ५० हजार दुकानदारांना नोटिसा पाठविण्याची ठाणे महापालिकेची तयारी
ठाणे रेल्वे स्थानक परिसरातील रस्ता रुंदीकरणात अडथळा ठरत असलेल्या बेकायदा बांधकामांवर हातोडा फिरवल्यानंतर ठाणे महापालिकेने इमारतीची सीमारेषा आणि रस्त्यादरम्यान येत असलेल्या जागेत वाढीव बांधकाम करणाऱ्या सुमारे ५० हजारांहून अधिक व्यापाऱ्यांना येत्या काही दिवसात नोटिसा बजाविण्याची प्रक्रिया सुरू करण्याचा निर्णय घेतला आहे. ही बांधकामे स्वेच्छेने काढा अन्यथा कारवाईला तयार राहा, असा इशारा महापालिकेने यापूर्वीच दिला आहे. या पाश्र्वभूमीवर मार्जिनल जागेत दुकान थाटून दुप्पट कमाई करू पाहणाऱ्या व्यापाऱ्यांना धक्का बसणार असून, येत्या १० ते १५ एप्रिलपासून संपूर्ण शहरभर यासंबंधीची धडक कारवाई सुरू करण्याचे नियोजन महापालिका वर्तुळात आखले जात आहे.
ठाणे शहरातील विविध भागांमध्ये रस्ता रुंदीकरणात अडथळा उभा राहील अशा पद्धतीने बांधकाम करण्यात आल्याचे अगदी सर्रासपणे दिसून येते. महापालिकेच्या परवानगीने उभारण्यात आलेल्या इमारतींमध्येही मार्जिनल जागेत जागोजागी असे बांधकाम करण्यात आले आहे. इमारतीच्या तळमजल्यावरील दुकाने आणि मूळ रस्त्यामधील मोकळ्या जागेत कोणतेही बांधकाम करण्यास विकास नियंत्रण नियमावलीतील तरतुदींनुसार मज्जाव आहे. ही जागा साधारणपणे नियमित व्यवहारासाठी इमारतीत येणाऱ्या पादचाऱ्यांना वावरण्यासाठी मोकळी असावी, असे गृहीत धरण्यात आले आहे. असे असताना ठाणेच नव्हे तर मुंबई आणि आसपासच्या सर्वच महानगरांमध्ये मार्जिनल जागेचा वापर व्यापाऱ्यांकडून बेकायदेशीर पद्धतीने होत असल्याचे दिसून आले आहे.
सर्वच रस्त्यांवर बांधकाम
मार्जिनल जागेत वाढीव बांधकाम करून जादा कमाई करण्याकडे व्यापाऱ्यांचा कल दिसून येतो. ठाण्यातील गोखले मार्ग, राम मारुती रोड, हरि निवास सर्कल, पाचपाखाडी, रेल्वे स्थानक रोड, वर्तकनगर अशा परिसरात मार्जिनल जागेचा गैरवापर सुरू असल्याची शेकडो उदाहरणे सहज सापडतील. महापालिकेने विकास आराखडय़ात निश्चित केल्याप्रमाणे शहरातील विविध रस्त्यांच्या रुंदीकरणाचे काम हाती घेतले आहे. या रुंदीकरणानिमित्ताने मार्जिनल जागांचा सुरू असलेला हा गैरवापर ठसठशीतपणे पुढे आला आहे.
रस्त्यांच्या कायापालटापूर्वी कारवाई
दरम्यान, येत्या १५ दिवसात ही बांधकामे स्वतहून काढा अथवा महापालिका कारवाई करेल, अशास्वरुपाचा इशारा गेल्या आठवडय़ात महापालिका आयुक्त संजीव जयस्वाल यांनी दिल्याने मार्जीनल जागांमध्ये सुरु असलेल्या बेकायदा दुकानदारीला चाप बसण्याची चिन्हे दिसू लागली आहेत. ठाणे रेल्वे स्थानक रस्त्यावरील अशा बांधकामांवर कारवाई केल्यानंतर महापालिकेने रेल्वे स्थानकच्या दिशेने येणाऱ्या इतर महत्वाच्या रस्त्यांचाही कायापालट करण्याचा निर्णय घेतला आहे. हे करण्यापुर्वी ही कारवाई उरकण्यात येणार आहे, अशी माहिती महापालिकेतील सुत्रांनी दिली. येत्या काही दिवसात शहरातील जवळपास ५० हजार वाढीव बांधकामांना नोटीसा बजाविण्यात येणार असून एप्रिल महिन्याच्या पहिल्या आठवडय़ात प्रत्यक्ष कारवाईला सुरुवात केली जाईल, असेही सुत्रांनी सांगितले. येत्या पावसाळ्यापुर्वी मार्जीनल जागांमधील हजारो बांधकामांवर हातोडा चालविला जाणार आहे.
