जाणून घ्या कसे असतील पर्यायी मार्ग आणि वाहतुकीतील बदल
ठाणे: दिवाळी पहाट निमित्ताने सोमवारी तलावपाली, नौपाडा, गोखले रोड परिसरात वाहतूक बदल लागू केले आहेत. सोमवारी सकाळी ६ ते दुपारी २ वाजेपर्यंत हे वाहतूक बदल लागू असतील. त्यामुळे परिसरातील पर्यायी मार्गांवर कोंडीची शक्यता व्यक्त केली जात आहे. तलावपाली परिसरात दरवर्षी खासदार राजन विचारे यांच्यातर्फे दिवाळी पहाट या कार्यक्रमाचे आयोजन केले जाते. या दिवाळी पहाट कार्यक्रमास ठाणे, कल्याण, डोंबिवली भागातून अनेक महाविद्यालयीन तरूण-तरूणी येत असतात. शिवसेनेत फूट पडल्याने यावर्षी न्यायालयाच्या निकालानंतर शिंदे गटाला या ठिकाणी दिवाळी पहाट कार्यक्रम साजरा करण्यास परवानगी मिळाली आहे. यावर्षीही गर्दी होऊन कोंडीची शक्यता वर्तविली जात आहे. त्यामुळे या मार्गावर पोलिसांनी वाहतूक बदल लागू केले आहेत.
असे आहेत वाहतूक बदल
प्रवेश बंद : डॉ. मुस चौकाकडून गडकरी रंगायतन चौकाच्या दिशेने वाहतूक सर्व प्रकारच्या वाहनांना डॉ. मुस चौक येथे प्रवेश बंद करण्यात येत आहे.
पर्यायी मार्ग : येथील वाहने डॉ. मुस चौकातून टॉवर नाका टेंभीनाका मार्गे इच्छित स्थळी जातील.
प्रवेश बंद : गडकरी रंगायतन जवळील चौकातून डॉ. मुस चौकाच्या दिशेने वाहतूक करणाऱ्या सर्व प्रकारच्या वाहनांना गडकरी चौक येथे प्रवेश बंद करण्यात येत आहे.
पर्यायी मार्ग : येथील वाहने गडकरी चौक येथून अल्मेडा चौक, वंदना सिनेमा, गजानन चौक, तीन पेट्रोल पंप, हरीनिवास चौक मार्गे इच्छित स्थळी जातील.
प्रवेश बंद : घंटाळी, साईनाथ चौक येथून गाडगीळ चौकाच्या दिशेने वाहतूक करणाऱ्या सर्व प्रकारच्या वाहनांना श्रध्दा वडापाव, घंटाळी चौक येथे प्रवेश बंद करण्यात येत आहे.
पर्यायी मार्ग : येथील वाहने घंटाळी चौकातून घंटाळी देवी मंदीर पथ मार्गे इच्छित स्थळी जातील.
प्रवेश बंद : गजानन चौक ते तीन पेट्रोल पंप येथील काका सोहनी पथ, गाडगीळ चौकाच्या दिशेने वाहतूक करणाऱ्या गाडगीळ चौका प्रवेश बंद करण्यात येत आहे.
पर्यायी मार्ग : येथील वाहने तीन पेट्रोल पंप, हरीनिवास चौक किंवा घंटाळी रोड मार्गे इच्छित स्थळी जातील.
प्रवेश बंद : राजमाता वडापाव दुकान येथून गजानन महाराजचौकाच्या दिशेने वाहतूक करणाऱ्या सर्व प्रकारच्या वाहनांना राजमाता वडापाव दुकानाजवळ प्रवेश बंद करण्यात येत आहे.
पर्यायी मार्ग : येथील वाहने राजमाता वडापाव सेंटर येथून गोखले रोडने इच्छित स्थळी जातील.
