कल्याण– शहरातील सर्वच वर्दळीच्या चौकांमध्ये गुरुवारी दहीहंडी उत्सव साजरा केला जाणार आहे. वाहतूक कोंडी टाळण्यासाठी वाहतूक विभागाने वाहतुकीसाठी गुरुवारी सकाळी ११ ते रात्रो १० वाजेपर्यंत शिवाजी चौक, कोळसेवाडी, रामबाग भागातील रस्ते मार्गात बदल केले आहेत.
भिवंडी शहराकडून दुर्गाडी चौक, लालचौकी मार्गे शिवाजी चौकाकडे येणाऱ्या सर्व प्रकारच्या वाहनांना दुर्गाडी चौक येथे प्रवेश बंद करण्यात आला आहे. यामधील मध्यम स्वरुपाची वाहने दुर्गाडी चौक येथे डावे वळण घेऊन पौर्णिमा चौक येथून इच्छित स्थळी जातील. दुचाकी, चारचाकी हलकी वाहने लालचौकी येथून डावे वळण घेऊन आधारवाडी मार्गे इच्छित स्थळी जातील.
शिळफाटा रस्त्याने पत्रीपूल मार्गे शिवाजी चौकाकडे येणाऱ्या सर्व प्रकारच्या वाहनांना पत्रीपूल येथे प्रवेश बंद करण्यात आला आहे. मध्यम स्वरुपाची वाहने पत्रीपूल येथे डावे वळण घेऊन गोविंदवाडी बाह्य वळण रस्त्याने इच्छित स्थळी जातील. हलकी वाहने गुरुदेव हाॅटेल येथे उजवे वळण घेऊन इच्छित स्थळी जातील.
हेही वाचा >>> डोंबिवलीतील गांधीनगर, स्टार कॉलनीमधील रस्त्यांची दुर्दशा, प्रवासी हैराण
मुरबाड रस्ता, इंदिरनगर छेद रस्ता येथून संतोषी माता रस्त्याकडे येणाऱ्या वाहनांना मधुरिमा स्वीट्स रामबाग गल्ली क्रमांक चार येथे प्रवेश बंद करण्यात येणार आहे. ही वाहने म्हसकर रुग्णालयाकडून इच्छित स्थळी जातील.
मुरबाड रस्त्याने सुभाष रस्तामार्गे शिवाजी चौकात येणाऱ्या वाहनांना, दीपक हाॅटेलकडून महमद अली चौकातून शिवाजी चौकात जाणाऱ्या वाहनांना महमद अली चौकात प्रवेश बंद करण्यात आला आहे. ही वाहने कल्याण रेल्वे स्थानका जवळील वलीपिर रस्त्याने इच्छित स्थळी जातील, असे कल्याण वाहतूक विभागाचे गिरिश बने यांनी सांगितले. गोविंदा पथकांना फडके मैदान, कृषी उत्पन्न बाजार समिती आवार, यशवंतराव चव्हाण मैदान येथे वाहने उभी करण्याची मुभा देण्यात आली आहे. अत्यावश्यक सेवेतील वाहनांना रस्ते बंदीचा नियम लागू राहणार नाही, असे वाहतूक उपायुक्त डाॅ. विनयकुमार राठोड यांनी सांगितले.
