दारुच्या बाटल्यांमुळे ठाणेकर कोंडीत, घोडबंदर मार्गावर रांगा

घोडबंदर मार्गावरुन दिवसाला हजारो अवजड वाहनांची वाहतुक होत असते. याच मार्गावरुन गुजरात येथून सुटणारी वाहने उरण जेएनपीटी, भिवंडीत येत असतात. तसेच हलक्या वाहनांची देखील मोठी वाहतुक होते. परंतु घोडबंदर मार्गावर विविध ठिकाणी मेट्रोची कामे किंवा इतर प्राधिकरणांची कामे सुरु आहेत. त्यामुळे वाहतुक कोंडीचा सामना नागरिकांना सहन करावा लागतो. घोडबंदर मार्गालगत लोकवस्ती वाढल्याने कोंडीत भर पडत असते. मंगळवारी पहाटे ३.३० वाजताच्या सुमारास गुजरातहून मुंबईत एक ट्रक येत होता. त्यामुळे मद्याच्या रिकाम्या बाटल्यांचे खोके होते. हा ट्रक गायमुख घाटात आला असता, वाहन चालकाचा ट्रकवरील नियंत्रण सुटले आणि ट्रक येथील बेस्टच्या बसगाडीला धडकून उलटला.

त्यानंतर बसगाडीमधील सर्व रिकाम्या बाटल्यांचे खोके रस्त्यावर पडले, घटनेची माहिती कासारवडवली वाहतुक पोलीस, ठाणे महापालिकेचे अग्निशमन दल आणि आपत्ती व्यवस्थापन विभागाला मिळाल्यानंतर पथके घटनास्थळी दाखल झाले. या अपघातामुळे वाहनांच्या रांगा लागण्यास सुरुवात झाली. रस्त्यावर बाटल्यांचा खच पडल्याने मार्गावर कोंडी झाली. दोन्ही मार्गावर त्याचा परिणाम झाला.

बेस्ट बसचालक जखमी

या अपघातात ट्रक एका बेस्ट बसगाडीला देखील धडकला. अपघातात बेस्ट बसगाडीचा चालक हर्षल कासकर (३२) यांना किरकोळ दुखापत झाली आहे. त्यांच्या उजव्या डोळ्यालगत किरकोळ मार लागला.

बाटल्यांचा रस्त्यावर खच

या अपघातामुळे बाटल्यांचा रस्त्यावर खच पडला होता. बचाव पथकाने हे खच बाजूला करण्यासाठी जेसीबी यंत्रांचा वापर केला. तर अपघातग्रस्त ट्रक हायड्रा क्रेनच्या साहाय्याने बाजूला करण्यात आला.

कोंडीमुळे हाल

अपघाताचा परिणाम घोडबंदर मार्गावर बसला. वाहनांच्या लांबच लांब रांगा लागल्या होत्या. अवघ्या १० मिनीटाचे अंतर पार करण्यासाठी वाहन चालकांना २५ ते ३० मिनीटे लागत होती. सकाळी ९ नंतरही येथे कोंडी कायम होती. उन्हाचे चटके त्यात कोंडी यामुळे वाहन चालकांचे हाल झाले.