ठाणे : मुंबई नाशिक महामार्गावरील एका विरुद्ध दिशेने येणाऱ्या डम्परची दुचाकीला धडक बसली. या धडकेत दोन तरूणांचा मृत्यू झाला आहे. शैलेश हळदनकर (३५) आणि मुस्ताक अन्सारी (३५) अशी मृतांची नावे आहेत. दोघेही त्यांच्या कंपनीत जात होते. डम्पर चालकाचा नारपोली पोलीस शोध घेत आहेत.
कळवा येथील खारेगाव भागात शैलेश हळदनकर राहत होते. तर मुस्ताक हा गोवंडीमध्ये वास्तव्यास होता. दोघेही भिवंडीतील वस्त्र तयार करणाऱ्या कंपनीत कामाला होते. मुस्ताक हा शिवणकाम करत होता. तर, शैलेश त्याचा सहकारी आहे. सोमवारी सकाळी मुस्ताक आणि शैलेश दोघेही दुचाकीवरून कामाला जात होते. त्यावेळी मुस्ताक दुचाकी चालवित होता. ते मानकोली नाका परिसरात आले असता, या मार्गावर एका डम्पर चालकाने विरुद्ध दिशेने डम्पर चालवित त्यांच्या दुचाकीला धडक दिली. मुस्ताक आणि शैलेश दोघेही डम्परच्या दोन्ही चाकाखाली आले.
हेही वाचा – पिंपरी पोलिसातील हवालदाराचे होत आहे कौतुक, शरीर सौष्ठव स्पर्धेत मिळवले सुवर्ण पदक
हेही वाचा – ‘दगडूशेठ’ गणपती मंदिरात मंगल स्वरांच्या नामघोषात गणेशजन्म सोहळा
डम्परची चाके त्यांच्या शरिर आणि डोक्यावरून गेली. त्यामुळे दोघांचा मृत्यू झाला. घटनेनंतर डम्पर चालक फरार झाला. याप्रकरणी सोमवारी सायंकाळी नारपोली पोलीस ठाण्यात गुन्हा दाखल करण्यात आला असून पोलिसांनी घटनास्थळावरून डम्पर जप्त केला आहे. तसेच चालकाचा पोलीस शोध घेत आहेत.
