उल्हासनगर : सेंच्युरी रेयॉन कंपनीच्या अग्निशमन दलाच्या जवांनानी वाचविले २० महिला कर्मचाऱ्यांचे प्राण

कर्मचाऱ्यांचा बाहेर पडण्याचा मार्ग बंद झाला होता –

शहाड येथील सेंच्युरी रेयॉन कंपनीच्या कामगार प्रवेशद्वारा समोर रवि तलरेजा यांचे रँम्बो पार्टी हे दुकान आहे. त्या दुकानात गुरूवारी दुपारी ३ वाजण्याच्या सुमारास शॉक सर्किटमुळे अचानक आग लागली. अचानक लागलेल्या या आगीमुळे दुकानात काम करण्याऱ्या महिला कर्मचारी घाबरल्या. त्यांनी दुकानाच्याच वरच्या मजल्यावर धाव घेतली. मात्र दुकानात लागलेली आग वेगाने पसरली. त्यामुळे या कर्मचाऱ्यांचा बाहेर पडण्याचा मार्ग बंद झाला. दुकानातील आग आणि महिलांची ओरड ऐकून सेंच्युरी रेयॉन कंपनीचे(निवृत्त कर्नल) सुरेश शिंदे यांनी आपल्या अग्निशमन दल व सुरक्षा विभागाच्या कर्मचाऱ्यांसह घटनास्थळी धाव घेतली.