उल्हासनगर महापालिका प्रभाग समिती क्रमांक चारमध्ये मोडकळीस आलेल्या घराच्या बांधकामावर कारवाई न करण्यासाठी तसेच नव्याने उभारत असलेल्या घराच्या बांधकाम परवानगी देण्यासाठी सहायक आयुक्तांसाठी लाचेची मागणी करणाऱ्या आणि ती स्विकारणाऱ्या उल्हासनगर महापालिकेच्या दोन कर्मचाऱ्यांना लाचलुचपत प्रतिबंधक विभागाने रंगेहाथ अटक केली आहे. ३० हजारांची लाचेची मागणी करत २५ हजार स्वीकारताना ही कारवाई करण्यात आली. यात प्रभारी मुकादम रतन जाधव आणि सफाई कामगार विजय तेजी यांना रंगेहाथ पकडण्यात आले असून सहायक आयुक्त महेंद्र पंजाबी यांचा शोध घेतला जातो आहे.
हेही वाचा >>> व्याजाचा व्यवसाय वाढीसाठी उल्हासनगरमध्ये पुजाऱ्याच्या घरी दरोडा टाकणारी टोळी अटकेत
भ्रष्टाचाराने बरबटलेल्या उल्हासनगर महापालिकेतील आणखी दोन लाचखोर कर्मचाऱ्यांना लाचलुचपत प्रतिबंधक विभागाच्या पथकाने लाच स्वीकारताना मंगळवारी रंगेहात अटक केली आहे. विशेष म्हणजे यंदाही सहाय्यक आयुक्तांसाठी लाच स्वीकारण्यात आली होती. यापूर्वीही अनेक घटनांमध्ये सहाय्यक आयुक्त लाचलुचपत प्रतिबंधक विभागाच्या जाळ्यात अडकले आहेत. मंगळवारी पुन्हा एकदा सहाय्यक आयुक्तांसाठी लाच मागणाऱ्या दोन पालिका कर्मचाऱ्यांना अटक करण्यात आली. तक्रारदाराच्या मोडकळीस आलेल्या घराच्या उभारणीसाठी बांधकाम परवानगी मिळावी आणि मोडकळीस आलेल्या घरावर कोणतीही कारवाई केली जाऊ नये यासाठी ३० हजार रुपयांची लाचेची मागणी करण्यात आली होती. प्रभाग समिती क्रमांक चारचे सहाय्यक आयुक्त महेंद्र पंजाबी यांच्यासाठी प्रभारी मुकादम रतन जाधव आणि सफाई कामगार विजय तेजी या दोघांनी 25 हजारांची लाच स्वीकारली. यावेळी दोघांना रंगेहात पकडले. या दोन्ही पालिका कर्मचाऱ्यांनी सहाय्यक आयुक्त महेंद्र पंजाबी यांच्यासाठी लाच स्वीकारल्याचे मान्य केले आहे. त्यामुळे सहाय्यक आयुक्त प्रभाग चार महेंद्र पंजाबी यांचा लाचलुचपत प्रतिबंधक विभागाकडून शोध घेतला जातो आहे. या सापळ्यानंतर उल्हासनगर महापालिकेतील भ्रष्टाचार पुन्हा एकदा चव्हाट्यावर आला आहे. विशेष म्हणजे प्रभारी असलेल्या कार्यकारी पदावरच्या अधिकाऱ्यांकडून लाचखोरी केली जात असल्याने पालिकेच्या कारभारावर प्रश्नचिन्ह उपस्थित होत आहेत.
