ठाणे : स्टेम प्राधिकरणाकडून जलवाहिनी दुरुस्तीचे काम हाती घेण्यात येणार असून या कामामुळे शुक्रवारी ठाणे शहराचा पाणी पुरवठा बंद राहणार आहे. या काळात ठाणे महापालिकेच्या स्वतःच्या पाणी पुरवठा योजनेचे नियोजन करुन टप्या टप्याने ठाणे शहरात एक वेळ पाणी पुरवठा सुरु ठेवण्याचे नियोजन प्रशासनाने केले आहे. यामुळे नागरिकांना २४ ऐवजी १२ तास पाणी बंदचा सामना करावा लागणार आहे.
ठाणे महापालिकेला स्टेम प्राधिकरणाकडून होणारा पाणी पुरवठा शुक्रवार, १३ डिसेंबर रोजी सकाळी ९ ते शनिवार १४ डिसेंबर रोजी सकाळी ९ असा २४ तासांचा बंद ठेवण्यात येणार आहे. या काळात देखभाल, दुरुस्ती आवश्यक कामे तातडीचे करण्यात येणार आहेत. या काळात ठाणे महापालिकेच्या स्वतःच्या पाणी पुरवठा योजनेचे नियोजन करुन टप्या टप्याने ठाणे शहरात एक वेळ पाणी पुरवठा सुरु ठेवण्याचे नियोजन प्रशासनाने केले आहे. या नियोजनानुसार, घोडबंदर रोड, पातलीपाडा, पवारनगर, कोठारी कम्पाउंड, आझादनगर, डॉगरीपाडा, वाघबीळ, आनंदनगर, कासारवडवली, ओवळा, इत्यादी ठिकाणाचा पाणी पुरवठा १३ डिसेंबर रोजी सकाळी ९ ते रात्री ९ वाजे पर्यंत बंद राहील. समतानगर, ऋतुपार्क, सिध्देश्वर, इंटरनिटी, जॉन्सन, जेल, साकेत. उथळसर, रेतीबंदर, कळव्याच्या व मुंब्राचा काही भागाचा पाणी पुरवठा १३ डिसेंबर रोजी रात्री ९ ते शनिवार, १४ डिसेंबर रोजी सकाळी ९ या वेळेत बंद राहील. अश्या रीतीने टप्या टप्याने एक वेळ पाणी पुरवठा सुरु ठेवण्याचे नियोजन करण्यात आलेले आहे.या बंदमुळे पुढील १ ते २ दिवस कमी दाबाने पाणी पुरवठा होण्याची शक्यता आहे.
