डोंबिवली: एका रिक्षा चालकाने भरधाव वेगाने तळोजा रस्त्यावर बुधवारी निष्काळजीपणे रिक्षा चालवली. गतिरोधक आला तरी रिक्षा चालकाने ब्रेक न लावल्याने रिक्षात बसलेली एक महिला प्रवासी रिक्षा गतीरोधकावर जोरदार आपटल्याने रिक्षेतून बाहेर फेकून रस्त्यावर पडली. या महिलेला साहाय्यक करण्याऐवजी रिक्षा चालक घटनास्थळावरुन पळून गेला.
या महिलेच्या हात, पाय, डोक्याला गंभीर दुखापत झाली आहे. मोहिनी जाधव असे जखमी महिला प्रवाशाचे नाव आहे. त्या आडिवली ढोकळी भागात राहतात. बुधावरी दुपारी त्या एका रिक्षेने तळोजा रस्त्याने पलावा प्रवेशव्दार क्रमांक तीनवरुन रिक्षेतून नोकरीच्या ठिकाणी चालल्या होत्या. या प्रवेशव्दारासमोर गतिरोधक आहे हे माहिती असुनही रिक्षा चालकाने गतिरोधका जवळ ब्रेक लावले नाहीत. त्यामुळे भरधाव रिक्षा गतिरोधकावरुन जात असताना जोराने आपटली. रिक्षेत बसलेली महिला प्रवासी रिक्षेच्या दरवाजातून बाहेर फेकली गेली.
अचानक बाहेर फेकल्याने मोहिनी यांना गंभीर दुखापत झाली. त्या मदतीचा धावा करत असताना रिक्षा चालकाने त्यांना रुग्णालयात किंवा त्यांना घरी पोहचविण्यासाठी साहा्य्य न करता घटनास्थळावरुन तो पळून गेला. मोहिनी या रुग्णालयात दाखल झाल्यामुळे मानपाडा पोलीस ठाण्यात गुन्हा दाखल करण्यास त्यांना उशीर झाला. अनोळखी रिक्षा चालकाविरुध्द मोहिनी यांनी तक्रार केली आहे. पोलीस उपनिरीक्षक विद्या लांडे या प्रकरणाचा तपास करत आहेत.
