आपल्या एका सहकाऱ्यावर पोलिसांचा खबरी असल्याचा आरोप करुन कल्याण मधील एका रहिवाशाने दुर्गाडी किल्ल्या जवळील कोन गावातील एका तरुणाला बेदम मारहाण करुन त्याला गंभीर दुखापत केली आहे. याप्रकरणी बाजारपेठ पोलीस ठाण्यात तरुणाच्या तक्रारी वरुन पोलिसांनी गुन्हा दाखल करुन तपास सुरू केला आहे. शुक्रवारी रात्री नऊ वाजता हा प्रकार गोविंदवाडी रस्त्यावर घडला.
पुणे : मेटे यांच्या पत्नीला विधानपरिषद आमदार करा ; शिवसंग्राम संघटनेची मागणी
गुलजार रहिम शेख (२५, रा. गुलशन सोसायटी, कोनगाव, भिवंडी) असे तक्रारदाराचे नाव आहे. तो नोकरी करतो. अश्फी मद्दु (२५, रा. गोविंदवाडी, कल्याण) असे आरोपीचे नाव आहे. बैलबाजार भागातील गोविंदवाडी रस्त्यावरील सुन्नी गोसिया मस्जिद जवळ हा प्रकार घडला आहे.पोलिसांनी सांगितले, गुलजार आणि त्यांचा मित्र हे दुचाकीवरुन आपल्या मित्राला भेटून परत कोन गाव येथे शुक्रवारी रात्री चालले होते. यावेळी गोविंदवाडी रस्त्यावर आरोपी अश्फी याने गुलजार याला थांबण्यास सांगितले. त्याच्याशी वाद घातला. आणि काही कळण्याच्या आत हाता मधील दांडक्याने गुलजार यांना मारहाण करण्यास सुरुवात केली. ‘तु पोलिसांचा खबरी आहे. तु पोलिसांना सगळी माहिती पुरवत असतो. तु माझी माहिती पोलिसांना दिली म्हणून पोलीस माझ्या घरी आले’ असे म्हणत गुलजार यांना अश्फी याने शिवीगाळ केली. त्याच्या हात, पायावर लाकडी दांडक्याचे फटके मारल्याने गुलजार जमिनीवर कोसळला. ‘तुला बघतो’ अशी धमकी देत आरोपी अश्फी घटना स्थळावरुन पळून गेला. गुलजारच्या साथीदाराने गुलजारला पोलीस ठाणे आणि रुग्णालयात नेले. गुलजारच्या तक्रारी वरुन पोलिसांनी गुन्हा दाखल केला आहे.अश्फी याने गुलजारला मारहाण केल्याने कोनगाव भागात उलटसुलट चर्चा सुरू झाली आहे.
