लोकसंख्या वाढली. वस्ती वाढली. मग लोकांनी जंगलांवर अतिक्रमण केलं. हिरवीगार जंगलं तोडली आणि काँक्रिटचं जंगल उभारलं. टोलेजंग इमारती बांधल्या गेल्या. जगाच्या नकाशावर असे अनेक देश आणि शहरे आहेत ती आज प्रदूषणाच्या विळख्यात सापडली आहेत. चीनमध्ये ही समस्या गंभीर आहे. लोकसंख्येच्या बाबतीत पहिल्या क्रमांकावर असलेला चीन प्रदूषणाच्या यादीतही अव्वल आहे. बीजिंग हे शहर जगातील सर्वात प्रदूषित शहर असल्याचं नुकतंच समोर आलं आहे. येथील लोकांना मोकळा श्वास घेणंही मुश्किल झालं आहे. झाडे या परिसरात नाहीतच आणि झाडे लावायची म्हटलं तर जागा कुठे आहे? लोकसंख्या इतक्या वेगानं वाढतेय जिथे माणसांना राहायला जागा नाही तिथे झाडं लावायला जागा कुठून येणार? शेकडो समस्या लोकांपुढे आ वासून उभ्या आहेत. आता प्रदूषणाच्या विळख्यातून सुटकेसाठी चीनचे प्रयत्न सुरू आहेत. त्यावर त्यांनी उपायही शोधून काढला आहे. काँक्रिटच्या जंगलातच हिरवेगार जंगल उभारण्याची तयारी चीनने सुरू केली आहे. वाचा : जाणून घ्या अमिताभ बच्चन यांच्या ट्विटच्या सुरूवातीला असणाऱ्या आकड्यांचा अर्थ चीनच्या Guangxi प्रांतात पहिली 'फॉरेस्ट सिटी' उभारण्यात येणार आहे. आता फॉरेस्ट सिटी म्हणजे काय? याबद्दल तुम्हालाही कुतुहल असेलच. इथे इमारतीची बांधणी अशा पद्धतीने करण्यात येणार आहे जिथे प्रत्येक मजल्यावर झाडे लावता येणार आहेत. अगदी इमारतीच्या गच्चीवरही झाडं लावता येतील. ३० हजार लोक या शहरात राहू शकतात. या संपूर्ण शहरात ४० हजारांहून अधिक झाडं लावण्यात येणार आहे. तसंच १०० प्रजातींची एक लाखांहून अधिक झाडेही येथे लावली जाणार आहेत. ही झाडं शहरातील प्रदूषण कमी करण्यात तसेच ते नियंत्रणात ठेवण्यात मदत करतील. यामुळे ऑक्सिजन तयार होईल आणि हवेतला कार्बन डायऑक्साइड कमी होण्यास मदत होईल. २०२० पर्यंत हे उद्दीष्ट पूर्ण करण्यात येणार आहे. प्रदूषण रोखण्यासाठी चीनने हा उपाय केला आहे. अशा प्रकारे काँक्रिटच्या जंगलात हिरवंगार जंगल निर्माण करण्याच्या चीनच्या या प्रयोगाचं कौतुक होत आहे. चीनमधल्या नानजिंगमध्ये देखील 'वर्टिकल फॉरेस्ट्स' उभारला जात आहे. २०१८ पर्यंत हा प्रकल्प पूर्णत्वास येईल अशी अपेक्षा आहे. प्रसिद्ध आर्किटेक्ट Stefano Boeri यांच्या कल्पनेतून वर्टिकल फॉरेस्ट्स हा प्रकल्प उभा राहिला आहे आणि अशा प्रकारे वर्टिकल फॉरेस्ट्स तयार करणारा चीन हा आशियातला पहिला देश ठरणार आहे. वाचा : यू-ट्युबवर प्रसिद्ध होण्यासाठी तिनं प्रियकराला गोळी घातली
