इस्रायलचं लष्कर आणि हमास या पॅलेस्टिनी दहशतवादी संघटनेमध्ये पुन्हा एकदा संघर्ष उफाळून आला आहे. तसा इस्रायल आणि पॅलेस्टाइन हा संघर्ष मागील अनेक वर्षांपासून चालत आला आहे. मात्र सोमवारपासून जुन्या जेरुसलेम शहराजवळ दोन्ही बाजूने हल्ले केले जात आहेत. ज्यू, ख्रिश्चन, मुस्लीम आणि अर्मेनियन लोकांसाठी महत्वाचं धार्मिक स्थळ असणाऱ्या या ठिकाणाला आता जवळजवळ युद्धभूमीचं स्वरुप आलं आहे. मध्य पूर्व आशियामध्ये उफाळून आलेल्या या संघर्षामागे काही तात्कालीन कारणंही आहेत. सोमवारपासून हमासने इस्रायलवर १६०० हून अधिक रॉकेट्स डागल्याचा आरोप इस्रायलच्या लष्कराने केला आहे. यापैकी ४०० रॉकेट्स गाझा पट्टीमध्येच पडली. इस्रायलच्या आयर्न डोम एअर डिफेन्स सिस्टीम या प्रणालीने सुमारे शंभर रॉकेट्स आकाशातच निकामी केले. आयर्न डोम ही इस्रायलची लघु पल्ल्याची क्षेपणास्त्रे हाणून पाडण्याची प्रणाली आहे. २०११ पासून ही यंत्रणा उपयोगात आहे. या यंत्रणेने कशापद्धतीने हमासने केलेला हल्ला परतवून लावला यासंदर्भातील व्हिडीओ इस्रायलमधील सुरक्षा यंत्रणांच्या ट्विटर अकाऊंटवरुन पोस्ट करण्यात आला आहे. हा व्हिडीओ ११ मे आहे. इस्त्रायलच्या आकाशामध्ये काही रॉकेट दिसत असून ही सर्व रॉकेट जमीनीवर पडण्याआधीच हवेत फुटताना दिसत आहेत. मात्र नंतर ते हवेतच नष्ट होताना दिसत आहेत. ही रॉकेट नष्ट होण्यामागील कारण आहे आयर्न डोम एअर डिफेन्स सिस्टीम. शहरावर रॉकेट हल्ला झाल्यानंतर ही यंत्रणा स्वयंचलित पद्धतीने काम सुरु करते. ही यंत्रणा सुरु झाल्यानंतर मोठ्याने भोंगे वाजू लागतात. या भोंग्याचा आवाजही या व्हिडीओमध्ये ऐकू येत आहे. WATCH as the Iron Dome Aerial Defense System intercepts rockets over southern Israel: pic.twitter.com/xUz3bMuTzz — Israel Defense Forces (@IDF) May 12, 2021 हा व्हिडीओ ८ हजार ३०० हून अधिक वेळा शेअर करण्यात आला असून त्याला ९ लाखांहून अधिक व्ह्यूज आहेत. काय आहे आयर्न डोम? ही एक शॉर्ट रेंज, ग्राउंड-टू-एयर, एअर डिफेन्स सिस्टम आहे ज्यात एक रडार आणि तामिर इंटरसेप्टर क्षेपणास्त्रांचा समावेश आहे. याचा वापर रॉकेट, तोफ (सी-रॅम) तसेच विमान, हेलिकॉप्टरचा प्रतिकार करण्यासाठी केला जातो. आयर्न डोम २०११ मध्ये कार्यान्वित करण्यात आलं होतं. राफेलने आयर्न डोम हे ९० टक्के तर इतर तज्ञांनी हे ८० टक्के यशस्वी असल्याचे मान्य केलं आहे. “हवाई हल्ल्यांपासून तसेच युद्धाच्या भूमीवर आणि शहरी भागांत देखील यापासून संरक्षण केले जाऊ शकते”, असे राफेलने आपल्या संकेतस्थळावर असे म्हटले आहे. आयर्न डोममध्ये तीन मुख्य सिस्टीम आहेत. ज्या तैनात करण्यात आलेल्या धोक्यांपासून वाचण्यासाठी जागेवर कवच निर्माण करतात. यामध्ये व्हेपन कंन्ट्रोल सिस्टिम (बीएमसी) आणि मिसाईल फायरिंग युनिट, ट्रॅकिंग रडार आहे. बीएमसी मुळात रडार आणि इंटरसेप्टर रॉकेट दरम्यान संपर्क साधतो. सर्व प्रकारच्या वातावरणामध्ये या यंत्रणेचा वापर करता येतो. किती आहे किंमत पूर्ण युनिटची किंमत ५० दशलक्ष डॉलर्सपेक्षा जास्त असू शकते. त्यातील एका इंटरसेप्टर तामीर रॉकेटची किंमत ८० हजार डॉलर आहे. याउलट यंत्रणेकरून निकामी करण्यात येणाऱ्या रॉकेटची किंमत ही १००० डॉलरपेक्षाही कमी असते. प्रत्येक आयर्न डोममध्ये दोन तामीर रॉकेट बसवण्यात आली आहेत.