अजब ! पाऊस पडावा म्हणून लग्न लावलेल्या बेडकांचा गावकऱ्यांकडून घटस्फोट

भोपाळमधील दुष्काळग्रस्त भागात १९ जुलै रोजी वरुण देवाकडे पाऊस पडावा अशी प्रार्थना करत बेडकांचं लग्न लावून देण्यात आलं होतं. यानंतर इतका पाऊस पडला आहे की, मध्य प्रदेशात अनेक ठिकाणी पूरपरिस्थिती निर्माण झाली आहे. गेल्या २४ तासांत भोपाळमध्ये ४८ मिमी पावसाची नोंद झाली आहे. रविवारी भोपाळमध्ये पावसाने १३ वर्षांचा रेकॉर्ड मोडला आहे.

पूरपरिस्थिती निर्माण झाल्याने धरणांचे दरवाजेही उघडण्यात आले आहेत. बुधवारी भोपाळमधील काही सखल भागांत मुसळधार पावसामुळे पाणी साचलं. परिस्थिती अजून बिघडू नये यासाठी इंद्रपुरी परिसरातील ओम शिव सेवा भक्ती मंडळाने बेडकांचा घटस्फोट केला आहे. अगदी पारंपरिक पद्धतीने हा घटस्फोट करण्यात आला.