Viral Video: तुम्हाला एखादी गोष्ट शिकायची असेल किंवा एखादा छंद जोपासायचा असेल, तर त्यासाठी वय महत्त्वाचे ठरत नाही. साठी उलटल्यानंतर एखादा कोर्स करणे, व्यायाम करणे असो, डान्स करणे असो किंवा एखादा छंद जोपासायचा असो; त्याला वयाचे बंधन नसते. याचा प्रत्यय अनेकदा अनेकांच्या कलाविष्कारातून दिसून येतो. आज सोशल मीडियावर असाच एक व्हिडीओ व्हायरल होत आहे. त्यामध्ये ९५ वर्षीय आजीने त्यांचे उल्लेखनीय नृत्यकौशल्य दाखवले आहे; जे अनेकांना थक्क करून सोडत आहे. आयआरएएस (IRAS) अनंत रूपनागुडी यांनी एक्स (ट्विटर)वर एक व्हिडीओ शेअर केला आहे. तमिळनाडूमध्ये “विश्रांती होम फॉर द एज्ड' म्हणजेच एका वृद्धाश्रमात कार्यक्रम आयोजित करण्यात होता. या कार्यक्रमादरम्यान ९५ वर्षीय आजींनी 'ओह रसिककुम सीमा' या तमीळ गाण्यावर नृत्य सादर केले. ९५ वर्षीय आजी १९४० च्या दशकात कलाक्षेत्र फाउंडेशनच्या विद्यार्थिनी होत्या. तसेच त्यांनी चंद्रलेखा (१९४८)सारख्या चित्रपटामध्ये नृत्यसुद्धा केले आहे, असे रूपनागुडी यांनी सांगितले आहे. ९५ वर्षीय आजीने सादर केलेलं नृत्य तुम्हीसुद्धा बघा. हेही वाचा…जुळून आल्या रेशीमगाठी! डेटिंग, मेट्रिमोनिअल साईट नव्हे ‘या’ ॲपद्वारे भेटले ते दोघे; पाहा प्रियकर-प्रेयसीची ही गोष्ट व्हिडीओ नक्की बघा… व्हायरल व्हिडीओत तुम्ही पाहिलं असेल की, ९४ वर्षीय आजी निळ्या-पिवळ्या रंगाची साडी नेसून नृत्य सादर करते आहे. विश्रांती होम फॉर द एज्ड म्हणजेच वृद्धाश्रमात येथे 'ओह रसिककुम सीमा' या तमीळ गाण्यावर डान्स करण्यास सुरुवात केली. व्हिडीओतील आजींनी सादर केलेल्या नृत्यातील स्टेप्स, पाऊलखुणा, हावभाव, 'सादगी' अनेकांचं लक्ष वेधून घेत आहे. तमीळ गाण्यावर आजींनी सादर केलेलं हे नृत्य पाहून तुम्हीसुद्धा मोहात पडाल आणि हा व्हिडीओ पुन्हा पुन्हा पाहाल एवढं नक्की. सोशल मीडियावर आजींचं कौशल्य दाखविणारा हा व्हिडीओ आयआरएएस (IRAS) अनंत रूपनागुडी यांनी त्यांच्या @Ananth_IRAS एक्स (ट्विटर) अकाउंटवरून व्हिडीओ शेअर केला आहे. सुंदर आणि कुशल कामगिरी दाखविणाऱ्या या हृदयस्पर्शी व्हिडीओनं अनेकांचं लक्ष वेधून घेतलं आहे. नेटकऱ्यांनीदेखील व्हिडीओवर आश्चर्य आणि कौतुकाचा वर्षाव केला आहे. एका युजरनं कमेंट केली आहे, "नवीन पिढीसाठी एक शिक्षक म्हणून तुम्ही चांगले योगदान देऊ शकता" आदी कमेंट्स नेटकरी करताना दिसत आहेत.
