Viral Video : एसटी किंवा ट्रॅव्हलने प्रवास करताना बस स्थानकावर प्रवाशांना नाश्ता करण्यासाठी गाडी थांबवण्यात येते . यादरम्यान तुम्हाला अनेक पदार्थ, पाण्याची बाटली किंवा कोल्ड्रिंक्स विकणारे अनेक व्यापारी दिसतात. हे विक्रेते कुटुंबासाठी आणि पोटापाण्यासाठी असे छोटे व्यवसाय करत असतात आणि मेहनतीने पैसे कमवत असतात. पण, काही जण यांची मस्करी करताना व यांच्याकडून फुकट सामान विकत घेण्याचा प्रयत्न करताना दिसून येतात. तर असाच एक व्हिडीओ व्हायरल होत आहे, ज्यात एक प्रवासी पॉपकॉर्न विक्रेत्याबरोबर विचित्र प्रँक(Prank ) करताना दिसून आला आहे.
एक बस रस्त्याकडेला उभी आहे. एक व्यापारी पॉपकॉर्नने भरलेली टोपली डोक्यावर ठेवून बसच्या बाजूला उभा आहे. तर अचानक एक अज्ञात व्यक्ती बसच्या खिडकीतून भरलेल्या टोपलीतून दोन पॉपकॉर्नची पाकिटे काढून घेतो. त्यानंतर विक्रेता त्याच्याकडे पैसे मागतो. अज्ञात व्यक्ती खिडकीतून हात बाहेर काढून पैसे देत असतो. जेव्हा पॉपकॉर्न विकणारा पैसे घेण्यासाठी हात पुढे करतो, तेव्हा अज्ञात व्यक्ती पैशांची नोट खिडकीतून लगेच आतमध्ये घेतो. पॉपकॉर्न विकणाऱ्या बरोबर अज्ञात व्यक्ती कशाप्रमाणे खोड्या करते आहे हे तुम्हीसुद्धा एकदा व्हिडीओतून बघाच.
हेही वाचा… नाशिकमध्ये शाहरुख खानच्या चाहत्यांचा प्रताप; थिएटरमध्येच फोडले फटाके, धक्कादायक VIDEO व्हायरल
व्हिडीओ नक्की बघा :
पॉपकॉर्न विकणाऱ्या बरोबर प्रँक करताना पाहून बस ड्रायव्हरने थांबवली बस :
अज्ञात व्यक्ती पैसे देताना पॉपकॉर्न विकणाऱ्याची मजा घेत असतो. अज्ञात व्यक्ती व्यापाऱ्याच्या हातात पैसे देण्याचे नाटक करतो आणि पैसे वारंवार विक्रेत्याच्या हाताजवळ नेऊन पुन्हा स्वतःजवळ घेतो. असे तो वारंवार करताना दिसतो. या दरम्यान बस हळूहळू पुढे जाऊ लागते. धावत्या बसमध्येसुद्धा अज्ञात व्यक्ती हा विचित्र खेळ सुरूच ठेवतो. ही सगळी घटना पाहून ड्रायव्हर बस थांबवतो आणि बसमधून खाली उतरतो. तसेच या प्रकरणाची दखल घेतो आणि अज्ञात व्यक्तीला पैसे देण्यास सांगतो. या दरम्यान अज्ञात व्यक्ती पैसे न देता निघून तर जाणार नाही ना… ही भीती विक्रेत्याच्या चेहऱ्यावर स्पष्ट दिसते आहे. हे पाहून तुम्ही काही क्षणासाठी भावूक व्हाल.
सोशल मीडियावर हा व्हिडीओ @ikpsgill१ या एक्स (ट्विटर) अकाउंटवरून शेअर करण्यात आला आहे. तसेच अशा प्रॅंक करणाऱ्या लोकांबरोबर काय करायला पाहिजे ? असे कॅप्शन या युजरने व्हिडीओला दिले आहे. व्हिडीओ पाहून अनेक जण, ‘त्याला शिक्षा म्हणून व्यापाऱ्याच्या भरलेल्या टोपलीतील पॉपकॉर्न विकून येण्यास सांगा’, ‘उठाबश्या काढायला लावा’, अशा प्रॅंक करणाऱ्यांना बसमधून उतरवून चपलेने मारलं पाहिजे’; अशा शब्दांत काही जण संताप व्यक्त करताना कमेंटमध्ये दिसून आले आहेत.
