अजगराचं नाव घेतलं तर आपल्यापैकी अनेकांना घाम फुटतो आणि अशा अजगराच्या समोरासमोर तुम्ही कधी आलात तर त्यावेळी तुमची अवस्था काय होईल? नक्कीच यावेळी तुम्हाला भीती वाटेल यात शंका नाही. कारण अजगर हा एक अतिशय धोकादायक सरपटणारा प्राणी आहे. शिवाय त्याच्यामध्ये माणसांसह इतर प्राण्यांना जिवंत गिळण्याची ताकद आहे. अजगराने एखाद्याला पकडले की त्यांच्यापासून सुटका करणं अशक्य असतं. मात्र, सध्या सोशल मीडियावर असा एक व्हिडिओ व्हायरल होत आहे, जो पाहून तुम्हाला डोळ्यांवर विश्वास ठेवणं कठीण होणार आहे.
हो कारण ज्या अजगराला पाहताच अनेकांना घाम फुटतो अशा भल्यामोठ्या अजगराबरोबर एक चिमुकला बिनधास्तपणे खेळताना दिसत आहे. व्हिडीओमध्ये एक लहान मुलगा अजगराला न घाबरता त्याच्याशी खेळताना दिसत आहे. खरं तर अनेक लहान मुलं एखाद्या प्राण्याला पाहताच रडू लागतात, पण या व्हिडीओतील चिमुकल्याने मात्र अजगराला खेळणं बनवलं असून तो त्याच्याशी खेळताना दिसत आहे.
चक्क अजगराबरोबर खेळतोय चिमुकला –
आश्चर्याची गोष्ट म्हणजे व्हिडीओतील अजगरही त्या लहान मुलाला कसलीही इजा करत नाही. शिवाय व्हिडीओ पाहणाऱ्यांना अजगर आणि मुलाची चांगली मैत्री आहे की काय? असा प्रश्न पडला आहे. हो कारण अजगराच्या अंगावर हा मुलगा बसला तरीही अजगर त्याला काहीही इजा करत नाही, इतकेच नव्हे तर व्हिडीओमधील चिमुकल्याने अजगराचं तोंडाला पडकलं तरीही अजगर शांत बसल्याचं दिसत आहे.
नेटकऱ्यांनी मुलाच्या धाडसाचं केलं कौतुक –
व्हायरल व्हिडिओ पाहिल्यानंतर नेटकऱ्याने वेगवेगळ्या प्रतिक्रिया द्यायला सुरुवात केली आहे. एका यूजरने कमेंटमध्ये लिहिलं आहे की, हा धाडसी मुलगा कोणाचा आहे?, तर दुसऱ्या एकाने म्हटलं आहे, “व्हिडिओ बनवणारा लहान मुलाच्या जीवाशी खेळत आहे.” आणखी एका नेटकऱ्याने लिहिलं आहे, “हा व्हिडीओ पाहून मी घाबरलो.”
