सोशल मीडियावर दररोज हजारो व्हिडिओ व्हायरल होत असतात. यातील काही व्हिडीओ मजेशीर असतात तर काही धक्कादायक असतात. शिवाय कधीकधी असे काही व्हिडीओ व्हायरल होतात जे पाहिल्यानंतर आपणाला डोळ्यांवर विश्वास ठेवणं कठीण होतं. सध्या असाच एक व्हिडीओ व्हायरल होत आहे. जो पाहून अनेकांना आश्चर्याचा धक्का बसला आहे.
आपल्यापैकी अनेकांनी टेलिव्हिजनवर कार रेसिंग दरम्यान कारचे टायर काही सेकंदात बदलण्यासाठी संपूर्ण टीम एकत्र काम करताना पाहिले आहे. मात्र, सामान्य मेकॅनिकला हे काम करण्यासाठी खूप वेळ लागतो. मात्र, व्हायरल होत असलेल्या या व्हिडिओमध्ये एक व्यक्तीने चक्क धावत्या रिक्षाचा टायर बदलला आहे. हवेत लटकलेल्या रिक्षाचा पंक्चर काढतानाचा हा व्हिडिओ सध्या सोशल मीडियावर मोठ्या प्रमाणात व्हायरल होत असून नेटकरी या व्हिडीओतील रिक्षा चालकाचे तोंडभरुन कौतुक करत आहेत.
थरारक व्हिडीओ व्हायरल –
@finetraitt नावाच्या ट्विटर अकाऊंटवरून शेअर करण्यात आलेल्या या व्हिडिओमध्ये एक ड्रायव्हर आपल्या अनोख्या कौशल्याने रिक्षाची एक बाजू हवेत उचलताना दिसत आहे. तर दुसरीकडे दुसऱ्या रिक्षातील एक व्यक्ती हवेत लटकलेल्या रिक्षाजवळ येतो आणि त्या रिक्षातील व्यक्तीच्या हातात टायर देतो. हवेत लटकल्यानंतरही ती व्यक्ती न घाबरता पंक्चर झालेले टायर बदलत असल्याचं व्हिडिओमध्ये दिसत आहे.
या थरारक घटनेचा व्हिडिओ नेटकऱ्यांना चांगलाच भावल्याचं दिसत आहे. आतापर्यत हा व्हिडीओ ९९ हजारांहून अधिक लोकांनी पाहिला आहे. तर व्हिडीओ पाहिल्यानंतर अनेकजण रिक्षा चालकाच्या टॅलेंटचे तोंडभरून कौतुक करत आहेत. एका नेटकऱ्याने ड्रायव्हरचे वर्णन मल्टी-टास्किंग असे केले आहे. तर अनेकांनी हे अशक्य असं काम ड्रायव्हरने शक्य करुन दाखवल्याचं म्हटलं आहे.
