दिवसेंदिवस महिलांवरील अत्याचाराच्या घटनांमध्ये सातत्याने वाढ होताना दिसत आहे. दररोज सोशल मीडियावर महिलांवर झालेल्या अत्याचाराशी संबंधित अनेक बातम्या पाहायला आणि वाचायला मिळतात. देशासह जगाच्या कानाकोपऱ्यात महिलांबरोबर घडणाऱ्या गैरवर्तनाच्या अनेक धक्कादायक घटना उघडकीस येत आहेत. कडक कायदे आणि पोलीस यंत्रणा सज्ज असतानाही अशा घटना कमी होताना दिसत नाहीत. पण महिलांनी दुसऱ्यांवर अवलंबून न राहता स्वत:चं रक्षण स्वत: करण्याची गरज आहे असं अनेकदा म्हटलं जातं, याचेच उदाहरण समोर आलं आहे. सध्या सोशल मीडियावर एक व्हिडीओ व्हायरल होत आहे. ज्यामध्ये एक व्यक्ती लिफ्टमधील महिलेशी गैरवर्तन करताना दिसत आहे. यावेळी महिलेने त्या व्यक्तीला चांगलाच चोप दिला आहे.
व्हायरल झालेल्या व्हिडीओमध्ये एका लिफ्टमध्ये महिला आणि पुरुष दोघेच दिसत आहेत. लिफ्टमध्ये दोघांशिवाय कोणीही नाही, त्यामुळे महिला तिच्या मोबाईलवर व्हिडिओ पाहत तिचा मजला येण्याची वाट पाहत आहे. लिफ्टमध्ये महिला एकटी असल्याचं पाहून पुरुषाच्या मनात तिची छेड काढण्याचा विचार येतो. त्यामुळे तो महिलेच्याजवळ जातो आणि तिला चुकीच्या पद्धतीने स्पर्श करण्याचा प्रयत्न करतो. सुरुवातीला महिला घाबरते आणि त्याच्यापासून लांब जाऊन उभी राहते. परंतु तो माणूस तिच्या खांद्यावर हात टाकण्याचा प्रयत्न करतो.
महिलेने शिकवला धडा –
व्हिडीओमध्ये दिसत आहे की, महिला त्या माणसापासून लांब जाताच तो पुन्हा तिच्या जवळ जाऊन गैरवर्तन करण्याचा प्रयत्न करतो. धक्कादायक बाब म्हणजे तो तिला चुकीच्या पद्धतीने स्पर्श करण्याचा प्रयत्न करतो. त्यामुळे महिला रागवते आणि त्याचा हात झटकून त्याच्या गालावर जोरात थप्पड मारते. शिवाय ती इतकी रागवते की थप्पड मारल्यानंतर न थांबता त्याला दोन लाथादेखील मारते. त्यानंतर तो व्यक्ती खाली पडतो. शिवाय त्याला योग्य तो धडा शिकवल्यानंतर महिला लिफ्टमधून बाहेर निघून गेल्याचंही दिसत आहे. हा व्हिडीओ पाहताच अनेक नेटकरी त्यावर वेगवेगळ्या प्रतिक्रिया देत आहेत. शिवाय महिलेने केलेली कृती योग्य आणि कौतुकास्पद असल्याचंही ते म्हणत आहेत.