अपूर्वा मुखिजाच्या वादानंतर श्रीमंत महिला युट्यूबर्स चर्चेत; श्रुती अर्जून आनंद, कोमल पांडे यांच्याबद्दल जाणून घ्या

व्हिडीओ कंटेट क्रिएटर युट्यूब आणि इतर माध्यमांतून लाखो रुपये कमावत असतात. व्हिडीओच्या माध्यमातून मिळालेली प्रसिद्धी विविध ब्रँडच्या जाहिरातीसाठी वापरली जाते. यातूनही आणखी पैसा मिळतो. अपूर्वा मुखिजा ही तरुणीही करोना काळात व्हिडीओ क्रिएटर म्हणून पुढे आली होती. तिच्याप्रमाणेच युट्यूबवरून पैसे कमविणाऱ्या काही तरुणींची माहिती घेऊ.

श्रुती अर्जुन आनंद – १०.२ दशलक्ष सबस्क्राइबर

श्रुतीने २०१० साली लाईफस्टाइल संदर्भात व्हिडीओ तयार करण्यास सुरुवात केली. ब्युटी टीप्स, मेक-अप हॅक्स आणि स्किनकेअर बद्दल माहिती देणारे व्हिडीओ श्रुतीकडून तयार करण्यात येतात. हळूहळू तिच्या व्हिडीओमध्ये कलात्मकता येऊ लागली. सध्या ती कौटुंबिक प्रकाराचेही व्हिडीओ तयार करते. तिच्याकडे ४५ कोटींची मालमत्ता असल्याचे सांगितले जाते.

निशा मधुलिका – १४.७ दशलक्ष सबस्क्राइबर

निशा मधुलिका यांचे युट्यूब चॅनेल खाद्यप्रेमींच्या पसंतीस उतरलेले आहे. २०११ साली त्यांनी चॅनेलची सुरुवात केली होती. विविध पद्धतीने शाकाहारी पदार्थ बनविणे त्यांना आवडते. पदार्थ बनविताना सोप्या भाषेत त्याची पद्धत सांगण्याची त्यांची हातोटी असल्यामुळे निशा मधुलिका यांना मोठा प्रेक्षकवर्ग लाभला आहे. मधुलिका यांची एकूण संपत्ती ४३ कोटी असल्याचे सांगितले जाते.

प्राजक्ता कोळी – ७.२१ दशलक्ष सबस्क्राइबर

प्राजक्ता कोळीच्या गर्ल नेक्स्ट डोअर शैलीच्या व्हिडीओंना तरुणाईमध्ये चांगली पसंती आहे. सुरुवातीला विनोदी शैलीचे व्हिडीओ करून प्रसिद्धी मिळाल्यानंतर प्राजक्ता चित्रपट, वेबसीरीजमध्येही अभिनय करू लागली. जुग जुग जियो, नियत आणि मिसमॅच्ड अशा मालिकांमधून तिने काम केले आहे. तिचे वार्षिक उत्पन्न १६ कोटी असल्याचे सांगितले जाते.