महिंद्रा ग्रुपचे व्यवस्थापकीय संचालक आणि अध्यक्ष आनंद महिंद्रा हे सोशल मीडियावर खूप सक्रिय असतात. ते सतत नवनवीन सोशल मीडिया ट्रेंड, देशी जुगाड यासारखे व्हायरल व्हिडीओ त्यांच्या एक्स (ट्विटर) अकाऊंटवरुन शेअर करत असतात. तसेच ते लोकांना नवनवीन माहिती देण्याचाही प्रयत्न करत असतात. त्यामुळे त्यांचा चाहता वर्गदेखील मोठ्या प्रमाणात आहे. तर कधीकधी आनंद महिंद्रा हे त्यांना आवडलेले मजेशीर व्हिडिओ शेअर करतात. सध्या त्यांनी असाच एक व्हिडिओ शेअर केला आहे, ज्यामध्ये एका व्यक्तीने ट्रॅक्टरबरोबर केलेला अनोखा जुगाड पाहायला मिळत आहे. परंतु व्हिडिओमधील व्यक्तीने हा जुगाड नेमका कशासाठी केला आहे? असा प्रश्न आनंद महिंद्रा यांच्यासह अनेकांना पडला आहे.
आनंद महिंद्रा म्हणाले, “मनोरंजक, पण का?”
आनंद महिंद्रा यांनी सोशल मीडियावर शेअर केलेल्या व्हिडिओमध्ये, एक लाल रंगाचा ट्रॅक्टर दिसत आहे. परंतु ज्यावेळी या ट्रॅक्टरचा ड्रायव्हर तुम्हाला दिसेल तेव्हा तुम्ही आश्चर्यचकित व्हाल, कारण या ड्रायव्हरने ट्रॅक्टरच्या मूळ सीटपासून जवळपास ६ ते ७ फूट उंचावर नवीन सीट तयार करुन तिथेच स्टेअरिंग लावल्याचं दिसत आहे. शिवाय तो या उंच सीटवर बसून ट्रॅक्टर चालवत आहे. शिवाय व्हिडिओमध्ये दिसत आहे की, ड्रायव्हरला हा अनोखी ट्रॅक्टर चालवताना कोणतीही अडचण येत नाहीये. या जुगाडाचा व्हिडिओ शेअर करताना आनंद महिंद्रा यांनी कॅप्शनमध्ये लिहिलं, “इंटरेस्टिंग! पण माझा एकच प्रश्न आहे, का?” व्हिडीओ पोस्ट केल्यापासून तो आतापर्यंत ५ लाख ९५ हजारांहून अधिक लोकांनी पाहिला आहे. तर हजारो लोकांनी तो लाईक केला आहे.
नेटकऱ्यांच्या प्रतिक्रिया –
या जुगाडू ट्रॅक्टरचा व्हिडिओ सोशल मीडियावर मोठ्या प्रमाणात व्हायरल होत असून त्यावर अनेक नेटकरी वेगवेगळ्या प्रतिक्रिया देत आहेत. कमेंट बॉक्समध्ये एका यूजरने लिहिलं, “त्याला वरती बसून ट्रॅक्टर पुढे किती ट्रॅफिक आहे ते बघायचं आहे.” तर दुसऱ्या यूजरने लिहिलं, “हा नारळाची शेती करणारा शेतकरी असल्याने त्याच्याकडे ट्रॅक्टरचा वापर करण्याचा दुसरा कोणताही पर्याय नाही.” तर तिसऱ्या एकाने मजेशीर कमेंट करत लिहिलं, “ऊँचे लोग ऊँची पसंद”
