सुप्रसिद्ध उद्योगपती आणि महिंद्रा समूहाचे अध्यक्ष आनंद महिंद्रा विविध क्षेत्रात कार्यरत आहेत. तसेच ते सोशल मीडियावरही बऱ्याचदा त्यांच्या पोस्टमुळे चर्चेत राहतात. अनेकदा व्यवसाय किंवा जीवनाबद्दल प्रेरणात्मक तर कौतुकास्पद गोष्टी पोस्टमध्ये शेअर करत असतात, तर आज त्यांनी पुन्हा एक पोस्ट शेअर केली आहे. आयआयटी बॉम्बेच्या काही सदस्यांचे त्यांनी कौतुक केले आहे आणि जगातील पहिली फोल्डेबल डायमंड फ्रेमची ई-बाईक याची झलक त्यांच्या पोस्टमधून दाखवली आहे.
आनंद महिंद्रा यांनी काही फोटो पोस्ट केले आहेत. यात त्यांनी काळ्या रंगाचे टीशर्ट आणि निळ्या रंगाची जीन्स परिधान केली आहे आणि एका अनोख्या सायकलवर ते बसलेले दिसत आहेत. पण, ही सायकल नसून ई-बाईक आहे ; जिचे नाव हॉर्नबॅक (Hornback) असे आहे. सुरुवातीला पहिल्या फोटोत आनंद महिंद्रा त्यांच्या गाडीच्या डिक्कीतून ई-बाईक बाहेर काढत आहेत. त्यानंतर ई-बाईक फोल्ड केलेली असते, त्यामुळे ई-बाईक जमिनीवर ठेवून त्याची रचना करून घेतात. तसेच नंतर ई-बाईकवर बसून त्यांचा आनंद घेताना दिसतात. आनंद महिंद्रा यांनी शेअर केलेल्या खास ई-बाईकची झलक एकदा तुम्हीसुद्धा पोस्टमधून बघाच…
पोस्ट नक्की बघा :
फोल्डेबल डायमंड फ्रेमची ई-बाईक :
प्रसिद्ध उद्योगपती आनंद महिंद्रा यांनी या ई-बाईकचे फोटो शेअर करून लिहिले की, आयआयटी बॉम्बेच्या काही सदस्यांचा आपल्याला पुन्हा एकदा अभिमान वाटेल. त्यांनी जगातील पहिली फोल्डेबल डायमंड फ्रेमची ई-बाईक (foldable diamond frame e-bike) तयार केली आहे. ई-बाईक इतर कंपन्यांच्या फोल्डेबल बाईकपेक्षा ३५ टक्के अधिक कार्यक्षम आहे, तर ही एकमेव अशी बाईक आहे ; जी फोल्ड केल्यानंतर उचलावी लागत नाही. तसेच ऑफिस कंपाउंडभोवती फिरण्यासाठी त्यांनी स्वतः एक हॉर्नबॅक एक्स १ (HORNBACK X1) विकत घेतली आहे. तसेच, ई-बाईकच्या स्टार्टअपमध्ये आनंद महिंद्रा यांनी गुंतवणूक केली आहे, असा खुलासादेखील त्यांनी केला आहे. तर ई-बाईक हॉर्नबॅक ॲमेझॉन तसेच फ्लिपकार्टवरही उपलबध आहे, असे त्यांनी कॅप्शनमध्ये लिहिले आहे.
प्रसिद्ध उद्योगपती आनंद महिंद्रा यांनी त्यांच्या अधिकृत @anandmahindra एक्स (ट्विटर) अकाउंटवरून ही पोस्ट शेअर केली आहे. त्यात त्यांनी ई-बाईकची झलक आणि त्याची वैशिष्ट्ये सांगणारी पोस्ट लिहिली आहे. तर अनेक जण पोस्ट पाहून ई-बाईकची किंमत विचारत आहेत. तर काही जण आयआयटी बॉम्बेच्या सदस्यांच्या या उत्तम कामगिरीबद्दल कौतुक करत आहेत. तसेच आनंद महिंद्रा यांचा अनोखा लूक पाहून त्यांचीसुद्धा प्रशंसा करताना कमेंटमध्ये दिसून आले आहेत.
