चौक आणि रस्त्यांना दिलेली नाव यावरून एखाद्या ठिकाणचा पत्ता शोधणं सोपं होतं. एखाद्या ठिकाणची खूणही पत्ता शोधण्यास महत्त्वाची ठरते. तलावाजवळ, मंदिराजवळ, अमुकतमूक ठिकाणाजवळ हे आपण नेहमीच अनुभवतो. मात्र बदलापुरात सध्या एका बंगल्याची जोरदार चर्चा आहे. त्या बंगल्याच्या नावावरून सध्या त्या परिसराची ओळख निर्माण झाली आहे. मुकुंद खानोरे यांनी ज्या क्षेत्रामुळे नाव कमावलं, त्या क्षेत्राचं नाव त्या बंगल्याला दिलं आहे. ‘शेअर मार्केटची कृपा’ हे नाव अनेकांचं लक्ष वेधून घेत आहे.
मुकुंद खानोरे हे मूळचे बदलापूर येथे राहणारे आहेत. कॉलेजमध्ये असल्यापासून त्यांनी शेअर मार्केटमध्ये पैसे गुंतवण्यास सुरुवात केली होती. त्यानंतर बारीकसारिक गोष्टींचा अभ्यास करत त्यांनी मार्केटमध्ये जम बसवला. इतक्या वर्षांच्या अनुभवातून खानोरे यांनी शेअर मार्केटमध्ये नाव आणि पैसे कमावले. शेअर मार्केटमध्ये नाव कमवल्यानंतर कोट्यधीश झालेल्या खानोरे यांनी बदलापुरातील कासगावमध्ये मोठी जागा विकत घेतली. या जागेत लहानपासून पाहिलेलं बंगला बांधण्याचं स्वप्न त्यांनी पूर्ण केलं. तसेच ज्या क्षेत्रामुळे हे स्वप्न पूर्ण झालं त्या क्षेत्राचं नाव त्यांनी आपल्या बंगल्याला दिलं. ‘शेअर मार्केटची कृपा’ असं नाव त्यांनी आपल्या बंगल्याला दिलं आहे.
Video: २७ वर्षांच्या तरुणीने ६ वर्षात कमावले १२० कोटी; आता सोशल मीडियावर देते इतरांना टिप्स
शेअर मार्केटमुळे आपल्याला आर्थिक भरभराट झाल्याचं मुकुंद यांनी सांगितलं आहे. यश ज्या क्षेत्रामुळे मिळालं त्या क्षेत्राबद्दल कृतज्ञता व्यक्त करण्यासाठी त्यांनी बंगल्याला असं नाव दिल्याचं सांगितलं आहे. शेअर मार्केटमधील तज्ज्ञ म्हणून आज मुकुंद खानोरे यांचा नावलौकिक आहे. अनेक जण त्यांच्याकडून आजही शेअर मार्केटचे धडे गिरवत आहेत.
