Chain Snatching In Ghaziabad : अनेक शहरांमध्ये चोरीच्या घटनांमध्ये दिवसेंदिवस वाढ होत आहे. चोरीच्या वाढत्या घटना रोखताना पोलिसांच्या नाकीनऊ येत आहेत. कारण- चोरी करून चोर अशा काही ठिकाणी पसार होतात की, त्यांना शोधणे अनेकदा कठीण होऊ बसते. त्यात हल्ली रस्त्यावरून चालतानाही चोर चलाखीने लोकांच्या गळ्यातील सोन्याचे दागिने, हातातील मोबाईल हिसकावून घेऊन पसार होत असल्याच्या घटना घडताना दिसतात. आता अशीच एक घटना समोर आली आहे; ज्यात बाईकवरून आलेले दोन चोर भरदिवसा महिलेच्या गळ्यातील सोनसाखळी चोरून फरारी होताना दिसत आहेत. या घटनेचा एक व्हिडीओ सध्या सोशल मीडियावर व्हायरल होत आहे.
ही घटना उत्तर प्रदेशातील गाझियाबाद शहरातील इंदिरापुरममधील वसुंधरा या भागात घडली आहे. ५ जुलै रोजी बाईकवरून आलेल्या दोन चोरांनी भरदिवसा रस्त्यावरून चालणाऱ्या महिलेच्या गळ्यातील सोनसाखळी हिसकावून घटनास्थळावरून पळ काढला. ही संपूर्ण घटना परिसरात लावण्यात आलेल्या सीसीटीव्ही कॅमेऱ्यात कैद झाली आहे.
महिलेने तत्काळ त्याच दिवशी पोलिसांत गुन्हा दाखल केला. पोलिसांनी तपास सुरू केला असून, आरोपींना पकडण्याचे प्रयत्न सुरू आहेत. चोर भरधाव बाईकवरून आले तेव्हा महिला रस्त्यावरून चालत होती. ती नातेवाइकांकडून घरी परतत होती. घरापासून काही अंतरावरच दोन चोरटे मागून आले आणि महिलेच्या मानेवर हात टाकून, तिच्या गळ्यातील सोनसाखळी लंपास करीत पसार झाले. या घटनेत चोरट्यांनी सोनसाखळी ओढल्याने महिला धक्का लागून रस्त्यावर जोरात पडली. घटनेच्या वेळी तिच्या आजूबाजूलाही कोणी नव्हते. त्यामुळे चोरांनी तिथून लगेच पळ काढला. या चोरांची ओळख अद्याप पटलेली नाही.
मात्र, महिलेने पतीसह इंदिरापुरम कोतवाली पोलिसांना या चोरीच्या घटनेची माहिती दिली. या घटनेचे सीसीटीव्ही फुटेज सोशल मीडिया प्लॅटफॉर्म एक्सवर अपलोड केल्यानंतर पोलिसांनी गुन्हा दाखल करून चोरट्यांचा शोध सुरू केला. मात्र, तुम्हीही गळ्यात सोन्याचे दागिने घालून रस्त्यावरून कुठे जात असाल, तर जरा सांभाळून जा. कारण- अशा प्रकारच्या घटना रोज समोर येत आहेत.
© IE Online Media Services (P) Ltd
