सध्या सोशल मीडियावर एका मुलाचा व्हिडीओ चांगलाच व्हायरल होत आहे. या व्हिडीओच्या सुरुवातीला मुलगा हसताना दिसत आहे, कारण तो त्याच्या मागून जाणाऱ्या एका तरुणीचा गुपचूप व्हिडीओ शूट करत होता. पण काही वेळाने मुलाला व्हिडिओ शूट करणं चांगलंच महागात पडतं. कारण मुलीच्या घरचे त्याला हे कृत्य करताना रंगेहाथ पकडतात. शिवाय तरुणीच्या कुटुंबीयांनी त्याला पकडताच तो तरुणीला आपली बहीण म्हणायला सुरुवात करतो. सोशल मीडियावर शेअर केलेल्या या व्हिडीओबद्दल मुलीला काहीच माहिती नसल्याचा दावा करण्यात आला आहे. कारण हा मुलगा गुपचूप तिचा व्हिडीओ शूट करत होता.
व्हिडिओच्या सुरुवातीला तो मुलगा एका ठिकाणी बसलेला दिसत आहे. यावेळी तो मागे वळून हसत आहे. तर त्याचवेळी त्याच्या मागून एक तरुणी जाते. ती तिच्या मोबाईलमध्ये व्यस्त असल्याचं दिसत आहे. इतक्यात अचानक तरुणीचे आई-वडील मुलाला ओरडताना दिसत आहेत. यावेळी तिच्या वडिलांनी मुलाचा हात पकडल्याचंही व्हिडीओत दिसत आहे. या घटनेचा व्हिडीओ @gharkekalesh नावाच्या ट्विटर अकाऊंटवरुन शेअर करण्यात आला आहे. जो आतापर्यंत २ लाखांहून अधिक लोकांनी पाहिला आहे. तर दोन हजारांहून अधिक लोकांनी लाईक केला आहे. तर अनेकांनी हा व्हिडिओ रिट्विट केला आहे.
नेटकऱ्यांच्या प्रतिक्रिया –
या मुलाचा व्हिडिओ व्हायरल होताच नेटकऱ्यांनी त्यावर वेगवेगळ्या प्रतिक्रिया द्यायला सुरुवात केली आहे. एका यूजरने लिहिले आहे, “जर बहीणच बनवायची होती, तर कशाला बघत होतास.” तर दुसऱ्याने लिहिलं, “जो व्यक्ती गुपचूप रेकॉर्ड करेल त्याला तुरुंगात जावे लागेल.” तर काही लोकांनी व्हिडिओ पाहताच संताप व्यक्त करत मुलाच्या अटकेची मागणी केली आहे. दुसरीकडे, काही नेटकरी या व्हिडीओवर मीम्स बनवून ते शेअर करत आहेत.
