पाण्यात उभे राहून पहारा देणाऱ्या भारतीय जवानांचे फोटो व्हायरल!

सोशल मीडियावर देशभक्तीच्या आणि राष्ट्रप्रेमाच्या गप्पा मारणारे अनेकजण आपण पाहिले असतील. यापैकी अनेकजण वेळ पडल्यास सैनिकांप्रमाणे शत्रूशी दोन हात करू वैगैरे थाटाच्या फुशारक्याही मारताना दिसतात. मात्र, युद्धासारखा बाका प्रसंग सोडला तरी सैनिकांचे दैनंदिन आयुष्यही किती खडतर आणि परीक्षा पाहणारे असते, याची कल्पना सध्या सोशल मीडियावर व्हायरल होत असलेल्या एका छायाचित्रावरून येऊ शकते. सीमा सुरक्षा दलाच्या (बीएसएफ) अधिकृत ट्विटर अकाऊंटवरून हे छायाचित्र शेअर करण्यात आले आहे. यामध्ये भारतीय जवान सीमाभागात खडा पहारा देताना दिसत आहेत. मात्र, या ठिकाणी निर्माण झालेल्या पूरपरिस्थितीमुळे या जवानांना २४ तास पाण्यात उभे राहून पहारा द्यावा लागत आहे. यामुळे जवानांची तब्येत बिघडू शकते. शिवाय साप, विंचू चावण्याचाही धोका असतो. मात्र, या कशाचीही तमा न बाळगता किंवा तक्रार न करता हे जवान पुराच्या आपल्या मातृभूमीच्या रक्षणाचे कर्तव्य बजावत आहेत.